દેશના વડાપ્રધાન નરેન્દ્ર મોદીનું ટ્વિટર એકાઉન્ટ શનિવારે મોડી રાતે કેટલાક સમય માટે હેક થયું હતું. તેમના એકાઉન્ટમાંથી બિટકોઇનને લીગલ કરવાનું ટ્વીટ કરવામાં આવ્યું હતું. આ ટ્વીટમાં એક લિન્ક પણ શેર કરવામાં આવી હતી. જેના પર લોકોને બિટકોઇન ક્લેમ કરવા માટે કહેવામાં આવ્યું હતું.
આ ટ્વીટ જોતા જ કેટલાક લોકોએ પ્રધાનમંત્રીનું ટ્વિટર એકાઉન્ટ હેક થયું હોવાનો અંદાજો લગાવ્યો હતો. ત્યારબાદ પ્રધાનમંત્રી કાર્યાલયમાંથી જાણકારી આપવામાં આવી હતી કે, PMનું એકાઉન્ટ થોડા સમય માટે હેક થઈ ગયું હતું. PMOએ જણાવ્યું છે કે, ‘આ દરમિયાન કેટલીક ટ્વીટ કરવામાં આવી હતી તેને ઇગ્નોર કરો’.
તપાસ કરવા મામલે સરકાર લેટેસ્ટ ટેકનૉલોજીનો ઉપયોગ કરી રહી છે. સૂત્રોએ જણાવ્યુ છે કે CERT-IN હેકિંગ મામલે તપાસ કરી રહી છે.
પ્રધાનમંત્રી નરેન્દ્ર મોદીનું ઓફિશિયલ ટ્વિટર હેન્ડલ @narendramodi મોડી રાતે હેક થઈ ગયું હતું. રાતે 2 વાગ્યાને 11 મિનિટે વડાપ્રધાનના એકાઉન્ટમાંથી ટ્વીટ કરવામાં આવ્યું હતું. જેમાં દાવો કરવામાં આવ્યો હતો કે, ‘અંતે ભારતે બિટકોઇનને કાયદેસર માન્યતા આપી છે. સરકાર 500 બિટકોઇન ખરીદી રહી છે અને તેને દેશના નાગરિકોમાં વહેંચશે’. આ ટ્વીટ સાથે એક સ્કેમ લિન્ક પણ શેર કરવામાં આવી હતી. બે મિનિટ પછી આ ટ્વીટ ડિલિટ કરવામાં આવ્યું હતું. ત્યારબાદ ફરી 2 વાગ્યાને 14 મિનિટે આવું જ ટ્વીટ કરવામાં આવ્યું હતું.