ભારતીય જનતા પાર્ટીના સાંસદોના એક જૂથે શુક્રવારે સંસદ ભવન સંકુલમાં રાષ્ટ્રપિતા મહાત્મા ગાંધીની પ્રતિમા પાસે કોંગ્રેસમાં વડાપ્રધાન નરેન્દ્ર મોદીની સુરક્ષામાં ખામીને લઈને વિરોધ પ્રદર્શન કર્યું હતું.
લોકેટ ચેટર્જી અને રાજેન્દ્ર અગ્રવાલ સહિત કેટલાક અન્ય સાંસદોએ કોંગ્રેસ વિરુદ્ધ સૂત્રોચ્ચાર કર્યા હતા અને પંજાબ સરકાર વડાપ્રધાનની સુરક્ષામાં થયેલી ભૂલ બદલ માફી માંગે તેવી માંગ કરી હતી. ભાજપના નેતાઓ પાસે કોંગ્રેસ અને પંજાબ સરકાર વિરોધી સૂત્રોચ્ચાર કરતા પોસ્ટર અને બેનરો પણ હતા.
ઉલ્લેખનીય છે કે, બુધવારે પંજાબની મુલાકાતે આવેલા વડા પ્રધાન મોદીની સુરક્ષામાં “ગંભીર ક્ષતિ” ની એક ઘટના બની હતી, જ્યારે ફિરોઝપુરમાં કેટલાક પ્રદર્શનકારીઓએ જે માર્ગ પરથી પીએમ મોદી પસાર થવાના હતા તે રસ્તો બંધ કરી દીધો હતો. જેના કારણે વડાપ્રધાન લગભગ ૨૦ મિનિટ સુધી ફ્લાયઓવર પર અટવાયા હતા. આ ઘટના બાદ વડાપ્રધાન કોઈ પણ કાર્યક્રમમાં હાજરી આપ્યા વગર દિલ્હી પરત ફર્યા હતા.
કેન્દ્ર સરકારે આ ઘટના માટે પંજાબની કોંગ્રેસ સરકારને જવાબદાર ઠેરવી છે અને તેની પાસેથી રિપોર્ટ મંગાવ્યો છે. જો કે પંજાબના મુખ્યમંત્રી ચરણજીત સિંહ ચન્નીએ દાવો કર્યો છે કે વડાપ્રધાનની સુરક્ષા માટે પૂરતી વ્યવસ્થા કરવામાં આવી હતી.