રાજ્યમાં હીટવેવની શરૂઆત થઇ ગઇ છે.
અમદાવાદ સહિત ૫ શહેરોમાં ગરમીનો પારો ૪૩ ડિગ્રી જયારે અન્ય ૪ શહેરોમાં ૪૨ ડિગ્રીથી વધુ નોંધાયો હતો.
આજકાલમાં અમદાવાદમાં ગરમી ૪૪ને વટાવી શકે છે. રવિવારે અમદાવાદનું મહત્તમ તાપમાન ૨.૯ ડિગ્રી વધીને ૪૩.૩ ડિગ્રી અને લઘુતમ તાપમાન ૧.૧ ડિગ્રી વધીને ૨૬.૧ ડિગ્રી નોંધાયું હતું.
હીટવેવની અસરથી અમદાવાદમાં મહત્તમ તાપમાનમાં ૧.૫ ડિગ્રીનો વધારો થયો હતો. તેમજ ૭ એપ્રિલ પછી એટલે કે ૧૫ દિવસ પછી ફરીથી અમદાવાદમાં ગરમીનો પારો ૪૩ ડિગ્રીને પાર કરી જતાં લોકોએ કાળઝાળ ગરમીનો અનુભવ કર્યો હતો.
આગામી અઠવાડિયા દરમિયાન સમગ્ર રાજ્ય હીટવેવને કારણે ગરમીમાં વધારો થશે. ૨૫ એપ્રિલે હવામાન વિભાગે સૌરાષ્ટ્રના ગીર-સોમનાથમાં ઓરેન્જ એલર્ટ તેમજ સુરત, વલસાડ, પોરબંદર, જુનાગઢ અને ભાવનગરમાં યલો એલર્ટ જારી કર્યું છે. ૨૬ એપ્રિલથી ચારથી પાંચ દિવસો સુધી રાજ્યના મોટાભાગના વિસ્તારોમાં ગરમીનો પારો વધવાની શક્યતા હોવાથી યલો એલર્ટ જારી કર્યું છે.
શહેરોમાં ગરમીનું તાપમાન :
અમદાવાદ 43.3
સુરેન્દ્રનગર 43
ગાંધીનગર 42.5
વડોદરા 42
કેશોદ 42
રાજકોટ 41.8
ડીસા 41.7
ભૂજ 41.4
કંડલા 41.8
વિદ્યાનગર 40.8
ભાવનગર 40
વલસાડ 39.5