DRDO ના વૈજ્ઞાનિક પ્રદીપ કુરુલકરની પાકિસ્તાનને ગુપ્ત માહિતી આપવાના આરોપમાં ધરપકડ કરવામાં આવી, ૧૫ મે સુધી ATS ની કસ્ટડીમાં રહેશે .
ડિફેન્સ રિસર્ચ એન્ડ ડેવલપમેન્ટ ઓર્ગેનાઈઝેશન (DRDO)ના વૈજ્ઞાનિક પ્રદીપ કુરુલકરને પાકિસ્તાનને ગુપ્ત માહિતી આપવાના આરોપમાં ધરપકડ કરવામાં આવી છે, તેને મંગળવારે પુણેની વિશેષ ATS કોર્ટેએ ૧૫ મે સુધી ATS કસ્ટડીમાં મોકલી દીધા છે. પ્રદીપ કુરુલકર હની ટ્રેપ ફસાયા બાદ તે પાકિસ્તાની ગુપ્તચર અધિકારીઓને સંવેદનશીલ માહિતી આપતો હતો. કુરુલકરની ધરપકડ કર્યા બાદ તેને નોકરીમાંથી કાઢી મૂકવામાં આવ્યા હતા. ડીઆરડીઓની ફરિયાદના આધારે મહારાષ્ટ્ર એટીએસે ૪ મેના રોજ પ્રદીપ કુરુલકરની ધરપકડ કરી હતી. પ્રદીપ કુરુલકર પૂણેમાં ડીઆરડીઓના ડાયરેક્ટર હતા.
પ્રદીપ કુરુલકર એવા સમયે હનીટ્રેપમાં ફસાઈ ગયો હતો કે, તેઓને નિવૃત્ત થવા આડે માત્ર છ મહિના બાકી હતા. પાપ્ત વિગતો મુજબ તે છેલ્લા છ મહિનાથી મોબાઈલ ફોન દ્વારા પાકિસ્તાનની ગુપ્તચર એજન્સીની એક મહિલાના સંપર્કમાં હતો. DRDOની વિજિલન્સ અને ઈન્ટેલિજન્સ ટીમ છેલ્લા કેટલાક મહિનાઓથી પ્રદીપ કુરુલકર પર નજર રાખી રહી હતી. ડીઆરડીઓ હેડ ક્વાર્ટરના વરિષ્ઠ અધિકારીની ફરિયાદના આધારે મહારાષ્ટ્ર એટીએસએ પ્રદીપ કુરુલકરની ઓફિશિયલ સિક્રેટ એક્ટ હેઠળ ધરપકડ કરી છે. ધરપકડ બાદ કુરુલકરને કોર્ટમાં રજૂ કરવામાં આવ્યો હતો. કોર્ટે આરોપીને ૯ મે સુધી પોલીસ કસ્ટડીમાં મોકલી આપ્યો છે. આજે કસ્ટડી પુરી થતાં કોર્ટે તેને ફરીથી ૧૫ મે સુધી કસ્ટડીમાં મોકલી આપ્યો છે.
મહારાષ્ટ્ર એટીએસ દ્વારા બહાર પાડવામાં આવેલી પ્રેસ રિલીઝમાં જણાવ્યું છે કે, ડીઆરડીઓના વૈજ્ઞાનિકો વોટ્સએપ મેસેજ, વોઈસ કોલ, વીડિયો કોલ વગેરે દ્વારા પાકિસ્તાનની ગુપ્તચર એજન્સીના ગુર્ગો સંપર્કમાં હતા. DRDO અધિકારીએ તેમના પદનો દુરુપયોગ કર્યો છે. દુશ્મન દેશના હાથમાં માહિતી જવાથી ભારતની સુરક્ષા માટે જોખમ ઊભું થઈ શકે છે. ATS એ વધુમાં જણાવ્યું હતું કે મહારાષ્ટ્ર પોલીસની આતંકવાદ વિરોધી ટુકડી, કાલાચોકી, મુંબઈએ ઓફિશિયલ સિક્રેટ એક્ટ ૧૯૨૩ ની કલમ ૧૯૨૩ અને અન્ય સંબંધિત કલમો હેઠળ કેસ નોંધ્યો છે.