પીએમ મોદીની આગેવાનીમાં મળેલી કેન્દ્રીય કેબિનેટની બેઠકમાં “PM E-Bus Seva યોજનાને મંજૂરી આપવામાં આવી છે. આ યોજનામાં ૧૦,૦૦૦ નવી ઈલેક્ટ્રીક બસો રાજ્યોને પૂરી પડાશે.
ઈલેક્ટ્રીક બસોની મોટી ખરીદી માટે કેન્દ્ર સરકારે એક મહત્વની યોજનાને મંજૂરી આપી છે. પીએમ મોદીની આગેવાનીમાં મળેલી કેન્દ્રીય કેબિનેટની બેઠકમાં “PM E-Bus Sevaને લીલીઝંડી આપી દેવાઈ છે. આ યોજના હેઠળ કેન્દ્ર સરકાર ૧૦,૦૦૦ નવી ઈલેક્ટ્રીક બસો ખરીદીને રાજ્યોને પૂરી પાડશે જેને માટે કુલ ખર્ચ ૫૭,૬૧૩ કરોડ આવશે. ઈલેક્ટ્રીક વાહનોના પ્રોત્સાહનની દિશામાં આ એક મોટું પગલું છે કારણ કે આ પહેલા ક્યારેક આટલી મોટી સંખ્યામાં બસો ખરીદાઈ નથી.
દેશના ૧૬૯ શહેરોમાં ૧૦,૦૦૦ બસો પૂરી પાડવામાં આવશે અને ૧૮૧ શહેરોમાં ઈન્ફ્રાસ્ટ્રક્ચર અપગ્રેડ કરવામાં આવશે. નવી ઈલેક્ટ્રીક બસો શહેરોમાં આવવાને કારણે ૪૫,૦૦૦ – ૫૫,૦૦૦ ડાયરેક્ટ નોકરીઓ ઊભી થશે.
કેન્દ્રીય કેબિનેટે રેલવે સાથે જોડાયેલા ૭ પ્રોજેક્ટને પણ મંજૂરી આપી છે. આ યોજનાઓ નવી રેલવે લાઇન નાંખવા અને રેલવે લાઇન અપગ્રેડ કરવા સાથે સંબંધિત છે. આ યોજનાઓ લગભગ ૨૦,૦૦૦ કરોડ રૂપિયાના ખર્ચે પૂર્ણ થશે.