ચાહકોનો એટલો ધસારો હતો કે સત્તાવાર વેબસાઇટ અને એપ્લિકેશન લગભગ ૩૫ થી ૪૦ મિનિટ સુધી ક્રેશ થઈ ગઈ હતી
ભારતમાં યોજાનાર ODI વર્લ્ડ કપ ૨૦૨૩ નો જોરદાર ક્રેઝ જોવા મળી રહ્યો છે. આ દરમિયાન ODI વર્લ્ડ કપ ૨૦૨૩ ની ટિકિટોનું વેચાણ ગઈકાલ એટલે કે શુક્રવાર ૨૫ ઓગસ્ટથી શરૂ થઈ ગયું છે. પ્રથમ દિવસે બિન-ભારતીય મેચની ટિકિટનું વેચાણ થયું હતું, પરંતુ આ દરમિયાન ચાહકોનો એટલો ધસારો હતો કે સત્તાવાર વેબસાઇટ અને એપ્લિકેશન લગભગ ૩૫ થી ૪૦ મિનિટ સુધી ક્રેશ થઈ ગઈ હતી. જેના કારણે રમતપ્રેમીઓને ટિકિટ બુક કરાવવામાં ભારે હાલાકીનો સામનો કરવો પડ્યો હતો.
ભારત માટે કોઈ મેચ નથી તો પણ આવી સ્થિતિ છે તો પછી તમે કલ્પના કરો કે જ્યારે ભારતની વોર્મ-અપ મેચોની ટિકિટનું વેચાણ ૩૦ મી ઓગસ્ટથી શરૂ થશે અને સત્તાવાર મેચો 31મી ઓગસ્ટથી શરૂ થશે ત્યારે શું થશે ? ગુવાહાટી અને તિરુવનંતપુરમમાં ભારતની પ્રેક્ટિસ મેચની ટિકિટ ૩૦ ઓગસ્ટથી ખરીદી શકાશે.એક દિવસ પછી, ચેન્નાઈ (વિરુદ્ધ ઑસ્ટ્રેલિયા, ઑક્ટોબર ૮), દિલ્હી (વિરુદ્ધ અફઘાનિસ્તાન, ઑક્ટોબર ૧૧) અને પૂણે (વિરુદ્ધ બાંગ્લાદેશ, ઑક્ટોબર ૧૯)માં ભારતની મેચો માટે ટિકિટો ખોલવામાં આવશે.
વર્લ્ડ કપની ટિકિટોનું વેચાણ ખૂબ મોડું શરૂ થયું છે અને પહેલા જ દિવસે વેચાણ એવી મેચોનું હતું જેમાં ભારત નથી રમી રહ્યું. જોકે પ્રક્રિયા સ્થાનિક સમય મુજબ રાત્રે 8 વાગ્યે શરૂ થઈ અને તરત જ ચાહકોએ ‘બુક માય શો’ એપ ક્રેશ થવાની ફરિયાદ કરી.આ એપ ૫ ઓક્ટોબરથી શરૂ થઈ રહેલા વર્લ્ડ કપ માટે ટિકિટિંગ પાર્ટનર છે.
દિલ્હીના રમતપ્રેમી અતીરવ કપૂરે શુક્રવારે કહ્યું, “તે ખરેખર નિરાશાજનક છે. ટિકિટના વેચાણની જાહેરાત આટલી મોડી અને ત્યાર બાદ મૂળભૂત સિસ્ટમનું માળખું તૈયાર નથી, તે શક્તિશાળી બીસીસીઆઈ અને આઈસીસીની છબીને કલંકિત કરે છે. આખી દુનિયામાં આવી ટુર્નામેન્ટ યોજાય છે જેના માટે લોટરી અને ટિકિટની કતાર જેવી વ્યવસ્થા ખૂબ જ સામાન્ય છે. ટિકિટનું વેચાણ શરૂ થયાના અડધા કલાક પછી વેબસાઇટે કામ કરવાનું શરૂ કર્યું પરંતુ ત્યાં સુધીમાં ઘણા ચાહકોની ધીરજ ખૂટી ગઈ હતી.
એકવાર ટિકિટ બુક થઈ જાય પછી ચાહકોને તેને કુરિયર દ્વારા પ્રાપ્ત કરવાનો અથવા નિર્ધારિત સ્થાન પર તેને ઉપાડવાનો વિકલ્પ આપવામાં આવશે. જે લોકો તેમની ટિકિટ કુરિયર સુવિધા દ્વારા મેળવવા માગે છે તેમણે ૧૪૦ રૂપિયા વધારાના ચૂકવવા પડશે.જેઓ નિર્ધારિત મેચના ૭૨ કલાક પહેલા ટિકિટ ખરીદે છે તેમના માટે કુરિયર વિકલ્પો લાગુ થશે. બીસીસીઆઈએ માહિતી આપી હતી કે ઈ-ટિકિટની સુવિધા ઉપલબ્ધ રહેશે નહીં.