મહેન્દ્ર સિંહ ધોનીએ ઈતિહાસ રચ્યો

આઈપીએલ ૨૦૨૪ માં ગઈકાલે ચેન્નઈ સુપર કિંગ્સ અને દિલ્હી કેપિટલ્સ વચ્ચે મેચ રમાઈ હતી. આ મેચ જોઇને ચેન્નઈના ફેન્સ ખૂબ ખુશ થયા હતા કારણ કે આ મેચમાં ચાહકોને CSKના પૂર્વ કેપ્ટન એમએસ ધોનીની વિસ્ફોટક બેટિંગ જોવા મળી હતી. ધોનીએ પ્રથમ બે મેચમાં માત્ર વિકેટકીપિંગ જ કરી હતી. પરંતુ દિલ્હી કેપિટલ્સ સામે રમાયેલી મેચમાં માહીની બેટિંગ પણ જોવા મળી હતી. બેટિંગમાં ધોનીએ ૧૬ બોલમાં ૪  ચોગ્ગા અને ૩ છગ્ગાની મદદથી અણનમ ૩૭ રન બનાવ્યા હતા. પરંતુ તે પહેલા તેણે વિકેટકીપિંગમાં ખાસ ત્રેવડી સદી પૂરી કરી અને આ આંકડાને સ્પર્શનાર વિશ્વનો પ્રથમ વિકેટકીપર બન્યો હતો.

ધોનીએ ટી-૨૦ ક્રિકેટમાં વિકેટકીપિંગ કરતા ૩૦૦ બેટરોને પોતાનો શિકાર બનાવ્યો હતો. ધોનીએ ટી-૨૦ ની ૩૬૭ ઇનિંગ્સમાં વિકેટકીપર તરીકે ૩૦૦ બેટરોને આઉટ કર્યા હતા. ધોની ૩૦૦નો આંકડો પાર કરનાર વિશ્વનો પ્રથમ વિકેટકીપર બની ગયો છે. પાકિસ્તાનનો પૂર્વ વિકેટકીપર કામરાન અકમલ આ યાદીમાં બીજા સ્થાને છે, જેણે ૨૮૧ ઇનિંગ્સમાં ૨૭૪ બેટરોને આઉટ કર્યા હતા.

ટી-૨૦ ક્રિકેટમાં સૌથી વધુ બેટરોને આઉટ કરનાર વિકેટકીપર

એમએસ ધોની – ૩૦૦ ( ૩૬૭ ઇનિંગ્સ )

કામરાન અકમલ – ૨૭૪ ( ૨૮૧ ઇનિંગ્સ )

દિનેશ કાર્તિક – ૨૭૪ ( ૩૨૫ ઇનિંગ્સ )

ક્વિંટન ડી કોક – ૨૭૦ ( ૨૯૦ ઇનિંગ્સ )

જોશ બટલર – ૨૦૯ ( ૨૫૯ ઇનિંગ્સ )

ધોનીએ આ ખાસ ત્રેવડી સદી પૃથ્વી શોનો કેચ પકડીને પૂરી કરી હતી. દિલ્હી કેપિટલ્સએ તેની ઇનિંગની બીજી વિકેટ પૃથ્વી શોના રૂપમાં ગુમાવી હતી. શોને જાડેજાએ આઉટ કર્યો હતો.