પહેલીવાર GST કલેક્શન રૂ. ૨ લાખ કરોડને વટાવી ગયું છે, કેન્દ્ર સરકારની તિજોરીમાં મોટી આવક.
લોકસભા ચૂંટણી ૨૦૨૪ ની વચ્ચે, GST કલેક્શનને લઈને કેન્દ્ર સરકાર માટે સારા સમાચાર આવ્યા છે. મોદી સરકારે એપ્રિલ ૨૦૨૪ માટે જીએસટી કલેક્શનના આંકડા જાહેર કર્યા છે. સૌથી મહત્વની વાત એ છે કે, એપ્રિલમાં જીએસટી કલેક્શનના તમામ રેકોર્ડ તૂટી ગયા છે અને નવો ઈતિહાસ રચાયો છે. પહેલીવાર GST કલેક્શન રૂ. ૨ લાખ કરોડને વટાવી ગયું છે. સરકારી ડેટા અનુસાર, GST કલેક્શન એપ્રિલ ૨૦૨૪ માં સૌથી વધુ ૨.૧૦ લાખ કરોડ રૂપિયા હતું.
એપ્રિલમાં દેશનું ગ્રોસ GST કલેક્શન રૂ. ૨.૧૦ લાખ કરોડની વિક્રમી ટોચે પહોંચ્યું હતું, જે ગયા વર્ષના સમાન સમયગાળા કરતાં ૧૨.૪ % વધુ હતું. સ્થાનિક વ્યવહારો અને આયાતમાં મજબૂત વૃદ્ધિને કારણે આ સંગ્રહ વધ્યો છે. નાણા મંત્રાલયે એક નિવેદનમાં જણાવ્યું હતું કે, જીએસટી કલેક્શન રૂ. ૨ લાખ કરોડને પાર કરી ગયું છે.
મંત્રાલયે જણાવ્યું હતું કે, “એપ્રિલ ૨૦૨૪માં ગ્રોસ ગુડ્સ એન્ડ સર્વિસ ટેક્સ (GST) કલેક્શન રૂ. ૨.૧૦ લાખ કરોડના રેકોર્ડ ઉચ્ચ સ્તરે પહોંચ્યું છે.” “આ ૧૨.૪ % ની નોંધપાત્ર વાર્ષિક વૃદ્ધિ દર્શાવે છે, જે સ્થાનિક વ્યવહારોમાં મજબૂત વૃદ્ધિ (૧૩.૪ %ની વૃદ્ધિ) અને આયાત (૮.૩ %ની વૃદ્ધિ) દ્વારા સંચાલિત છે.”
ગયા વર્ષે કલેક્શન રૂ. ૧.૭૮ લાખ કરોડથી વધુ હતું, જ્યારે એપ્રિલ ૨૦૨૩માં તે રૂ. ૧.૮૭ લાખ કરોડ હતું. એપ્રિલ ૨૦૨૪ માટે ‘રિફંડ’ પછી ચોખ્ખી GST આવક રૂ. ૧.૯૨ લાખ કરોડ રહી હતી, જે ગયા વર્ષના સમાન સમયગાળાની સરખામણીમાં ૧૭.૧ %ની પ્રભાવશાળી વૃદ્ધિ દર્શાવે છે.
એપ્રિલમાં કેન્દ્રીય જીએસટી કલેક્શન રૂ. ૪૩,૮૪૬ કરોડ અને રાજ્યનું જીએસટી કલેક્શન રૂ. ૫૩,૫૩૮ કરોડ હતું. ઇન્ટિગ્રેટેડ GST રૂ. ૯૯,૬૨૩ કરોડ હતો, જેમાં આયાતી માલ પર એકત્રિત રૂ. ૩૭,૮૨૬ કરોડનો સમાવેશ થાય છે. સેસ કલેક્શન રૂ. ૧૩,૨૬૦ કરોડ રહ્યું હતું, જેમાં આયાતી માલ પર એકત્ર કરાયેલ રૂ. ૧,૦૦૮ કરોડનો સમાવેશ થાય છે.