આઈએએસ પૂજા ખેડકર દ્વારા જાતિ અને વિકલાંગતાના નકલી પ્રમાણપત્રોના આધારે નોકરી મેળવવાના કેસ બાદ અન્ય અધિકારીઓ પર પણ નકલી ડોક્યુમેન્ટ અને પ્રમાણપત્રો પર નોકરી મેળવવાના સોશિયલ મીડિયા પર આરોપ લાગી રહ્યા છે. આ બાજુ પૂજા ખેડકરની માતા સામે પણ પોલીસ ફરિયાદ નોંધાયા બાદ કાર્યવાહી થઈ રહી છે.
ભારતીય વહીવટી અધિકારી (IAS) પૂજા ખેડકર પર જાતિ અને વિકલાંગતાના નકલી પ્રમાણપત્રો આપવાનો આરોપ લાગ્યા પછી, સોશિયલ મીડિયા પર અન્ય અધિકારીઓ પર પણ સમાન આરોપો થવા લાગ્યા છે. આવી સ્થિતિમાં, સિવિલ સર્વિસ પરીક્ષા આયોજિત યુનિયન પબ્લિક સર્વિસ કમિશન (UPSC) ની પસંદગી પ્રક્રિયા દરમિયાન પ્રમાણપત્રોની ચકાસણી સાથે સંબંધિત સિસ્ટમ પણ પ્રશ્નના ઘેરામાં આવી ગઈ છે.
યુપીએસસીને આ બાબતોની ગંભીરતાથી તપાસ કરવા આગ્રહ
નિષ્ણાતો માને છે કે, યુપીએસસીએ આ બાબતોને ગંભીરતાથી અને તાત્કાલિક લેવી જોઈએ અને પારદર્શક રીતે તેની સંપૂર્ણ તપાસ કરવી જોઈએ. જેથી આ પરીક્ષા પર ઉમેદવારોનો આત્મવિશ્વાસ સંપૂર્ણ રીતે અકબંધ રહે. જો દોષિત ઠરે તો સંબંધિત અધિકારીને માત્ર બરતરફ જ નહીં પરંતુ, તેની પાસેથી તાલીમનો ખર્ચ અને પગાર પણ વસૂલવો જોઈએ. પૂજા ખેડકર દ્વારા સત્તા અને વિશેષાધિકારોના દુરુપયોગનો મામલો પ્રકાશમાં આવ્યા બાદ, ભારતીય વહીવટી સેવા (IAS) અને ભારતીય પોલીસ સેવા (IPS) દ્વારા બનાવટી પ્રમાણપત્રોના ઉપયોગ અંગે સોશિયલ મીડિયા પર દાવાઓ અને પ્રતિ-દાવાઓનો ધમધમાટ શરૂ થયો છે.
લોકોએ વિગતો સાથે ઘણા અધિકારીઓના નામ અને ફોટા પણ શેર કર્યા
સોશિયલ મીડિયા પર લોકોએ કેટલાક IAS અને IPS અધિકારીઓના નામ, ફોટા અને અન્ય વિગતો શેર કરી છે, અને દાવો કર્યો છે કે, તેઓ અન્ય પછાત વર્ગો (નોન-ક્રીમી લેયર) અને આર્થિક રીતે નબળા વર્ગો (EWS) માટે મળતા ઉપલબ્ધ લાભો મેળવવા નકલી પ્રમાણપત્રોનો ઉપયોગ કર્યો છે.
આ આરોપોના પ્રકાશમાં, યુપીએસસીના પૂર્વ સભ્ય અને ઉત્તર પ્રદેશના પૂર્વ પોલીસ મહાનિર્દેશક વિક્રમ સિંહે જણાવ્યું હતું કે, યુપીએસસીના પ્રમાણપત્રોની ચકાસણીની સિસ્ટમ ખૂબ સારી છે, પરંતુ કેટલાક લોકો મની પાવર અને અન્ય પાવરનો ઉપયોગ કરી ભરતી સિસ્ટમની આંખમાં ધૂળ નાખે છે. UPSC એ તમામ સિવિલ સર્વિસ અધિકારીઓની તપાસ કરવા માટે તાત્કાલિક એક મેડિકલ બોર્ડની રચના કરવી જોઈએ, જેમના પર નકલી પ્રમાણપત્ર આપવાનો આરોપ છે. તેમના તમામ સર્ટિફિકેટની ફરીથી સંપૂર્ણ તપાસ થવી જોઈએ.
વિક્રમ સિંહે કહ્યું કે, એવું લાગે છે કે આ મામલા પાછળ કોઈ સંગઠિત ગેંગ છે, જેનો પર્દાફાશ થવો જોઈએ. જેઓ દોષિત સાબિત થાય છે તેમને કાયદા મુજબ કડક સજા મળવી જોઈએ. યુપીએસસી સામે આજદિન સુધી કોઈ આક્ષેપો કરવામાં આવ્યા નથી તેમ છતાં સરકારે હવે આ બાબત પ્રકાશમાં આવતા કેસોની સીબીઆઈ તપાસની ભલામણ કરવી જોઈએ, જેથી દેશની સૌથી મોટી પરીક્ષા આયોજિત કરતી ભરતી સંસ્થાની પ્રતિષ્ઠા પર કોઈ ડાઘ ન લાગે.
ગુરુકુલ IAS હેડ પ્રણય અગ્રવાલનું કહેવું છે કે, પૂજા ખેડકર પરના આરોપો આ પરીક્ષાના ઉમેદવારો માટે આંચકાથી ઓછા નથી. તેમજ સોશિયલ મીડિયા પર અધિકારીઓ પર લગાવવામાં આવી રહેલા આરોપો પરથી લાગે છે કે, આ પ્રકારનો આ પહેલો કિસ્સો નથી.
અગ્રવાલ કહે છે કે UPSC પર હજુ કોઈ ડાઘ નથી અને લાખો ઉમેદવારોનો વિશ્વાસ કમિશન પર છે. તેણે પોતાની પ્રતિષ્ઠાને બચાવવા માટે તાત્કાલિક અને પારદર્શક તપાસ શરૂ કરવી જોઈએ. તેમનું માનવું છે કે, પ્રમાણપત્રોની તપાસ કરતી એજન્સીઓએ તેમની પ્રક્રિયાને મજબૂત કરવાની જરૂર છે. યુપીએસસીએ આવી ફરિયાદો માટે હેલ્પલાઈન બનાવવી જોઈએ અને આ માધ્યમથી મળેલી ફરિયાદોના આધારે તપાસ થવી જોઈએ. આનાથી ઉમેદવારોના આત્મવિશ્વાસને પુનઃસ્થાપિત કરવામાં મદદ મળશે, જે હચમચી ગયા છે.
સિવિલ સર્વિસ પરીક્ષાની તૈયારી કરતી સંસ્થા, નિર્માણ IAS માં પોલિટી અને બંધારણના શિક્ષક રાજ શેખર દાવો કરે છે કે, દેશમાં મોટી સંખ્યામાં EWS અને PWD પ્રમાણપત્રો બનાવટી રીતે બનાવવામાં આવે છે. તેમણે કહ્યું કે, પૈસાના આધારે દેશમાં આ પ્રમાણપત્રો મેળવવા ખૂબ જ સરળ છે. આ છેતરપિંડી પ્રમાણપત્રોની ચકાસણી દરમિયાન થાય છે જ્યારે ઉમેદવારને UPSC પરીક્ષા પાસ કર્યા પછી પોસ્ટ કરવામાં આવે છે.
તેમણે કહ્યું કે, ૨૦૧૧ થી આવા મામલાઓની સુનાવણી થઈ રહી છે. UPSC એ ત્યારથી લઈને તમામ અનામત વર્ગના ઉમેદવારોના પ્રમાણપત્રોની સંપૂર્ણ તપાસ કરવી જોઈએ. સરકારે વિકલાંગતા અને જાતિ પ્રમાણપત્ર આપવાની વ્યવસ્થામાં પણ સુધારો કરવો જોઈએ. કર્મચારી અને પરીક્ષણ વિભાગે પોસ્ટિંગ સમયે પ્રમાણપત્રોની સંપૂર્ણ તપાસ કરવી જોઈએ.
તો, સિવિલ સર્વિસ પરીક્ષાની તૈયારી કરી રહેલા ધ્રુવે કહ્યું કે, તેણે બે વખત મુખ્ય પરીક્ષા આપી છે, પરંતુ સફળતા મળી નથી. તે કહે છે કે, તેના જેવા હજારો ઉમેદવારો છે, જેઓ આ પરીક્ષા આપે છે, પરંતુ UPSC માટે કોઈના મનમાં શંકા નહોતી. પરંતુ, હવે જે કિસ્સાઓ પ્રકાશમાં આવી રહ્યા છે, તેના કારણે વિશ્વાસ થોડો ડગમગી રહ્યો છે. તેમણે એવી આશંકા વ્યક્ત કરી હતી કે, અત્યાર સુધી ઘણા લાયક ઉમેદવારોના હક અન્ય કોઈ છીનવી રહ્યું છે. સોશિયલ મીડિયાના માધ્યમથી આવતા તમામ કેસોની તપાસ કરવી ખૂબ જ જરૂરી છે.
તો, લાલ બહાદુર શાસ્ત્રી નેશનલ એકેડેમી ઓફ એડમિનિસ્ટ્રેશનના પૂર્વ વડા સંજીવ ચોપરાએ જણાવ્યું હતું કે, જેઓ સિવિલ સર્વિસમાં જોડાવા માટે નકલી જાતિ અને વિકલાંગતા પ્રમાણપત્રોનો ઉપયોગ કરતા જોવા મળે છે, તેમને માત્ર બરતરફ કરવા જોઈએ નહીં, પરંતુ તેમની પાસેથી તાલીમ ખર્ચ અને પગારની પણ ભરપાઈ કરવી જોઈએ.
પૂજા ખેડકરના ઘર પાસેનું ગેરકાયદે બાંધકામ હટાવ્યું
પુણેમાં તાલીમાર્થી IAS અધિકારી પૂજા ખેડકરના પારિવારિક બંગલા પાસે એક ગેરકાયદેસર માળખું હટાવવામાં આવ્યું છે, જ્યારે નાગરિક સંસ્થાએ તેને હટાવવા માટે નોટિસ પાઠવી હતી. પુણે મ્યુનિસિપલ કોર્પોરેશન (પીએમસી) દ્વારા નિર્ધારિત સમયમર્યાદા હજુ સુધી સમાપ્ત થઈ ન હોવાથી ખેડકરના પરિવારે કથિત દબાણ દૂર કર્યું હોઈ શકે છે, એક અધિકારીએ બુધવારે જણાવ્યું હતું.
પીએમસીના અધિકારીઓએ ૧૩ જુલાઈના રોજ શહેરના બાનેર રોડ વિસ્તારમાં સ્થિત બંગલાની બહાર એક નોટિસ ચોંટાડીને આઈએએસ અધિકારીના પરિવારને ૬૦ ફૂટ લંબાઈ, ત્રણ ફૂટ પહોળાઈ અને બે ફૂટ ઊંચાઈના અનધિકૃત બાંધકામને દૂર કરવા જણાવ્યું હતું. મિલકતને અડીને ફૂટપાથ હોવાનું જણાવ્યું હતું.
સિવિક બોડીના એક વરિષ્ઠ અધિકારીએ જણાવ્યું હતું કે, અમે બંગલા પર નોટિસ ચોંટાડીને તેમને (ખેડકરના પરિવારને) સાત દિવસમાં દબાણ દૂર કરવા જણાવ્યું હતું. નોટિસમાં કહેવામાં આવ્યું છે કે, જો પરિવાર સાત દિવસની અંદર માળખું દૂર કરવામાં નિષ્ફળ જશે તો PMC તેને હટાવી લેશે અને તેમની પાસેથી ખર્ચ વસૂલ કરશે. પુણે મ્યુનિસિપલ કોર્પોરેશને હજુ સુધી સ્ટ્રક્ચર હટાવ્યું નથી કારણ કે, હજુ સમયમર્યાદા પૂરી થઈ નથી. ખાનગી કામદારોને નોકરીએ રાખીને પરિવારે જાતે જ તે તોડી નાખ્યું હશે.
ખેડકર પર આરોપ છે કે, તેણે કથિત રીતે વિકલાંગતા અને અન્ય પછાત વર્ગ (ઓબીસી) ક્વોટાનો IAS માં પદ મેળવવા માટે દુરુપયોગ કર્યો હતો. આ સિવાય તેમના પર પુણે કલેક્ટર ઓફિસમાં પોસ્ટિંગ દરમિયાન અયોગ્ય વર્તન કરવાનો પણ આરોપ છે.
તાલીમાર્થી IAS પૂજા ખેડકરની માતા મનોરમાની પુણે પોલીસે અટકાયત કરી, ખેડૂતોને ધમકી આપવાનો આરોપ
વિવાદોમાં ફસાયેલી IAS તાલીમાર્થી પૂજા ખેડકરની માતા મનોરમા ખેડકરને ગુરુવારે પોલીસે કસ્ટડીમાં લીધી હતી. પુણે ગ્રામીણ પોલીસના એસપી પંકજ દેશમુખે જણાવ્યું કે, તે રાયગઢ નજીક મહાડમાં એક હોટલમાં રોકાઈ હતી. તેમની સાથે પોલીસની ત્રણ ટીમ પુણે આવી રહી છે.
પોલીસ તેમના ઘરે પણ ગઈ હતી, પરંતુ તે ત્યાં મળ્યા ન હતા
આ અઠવાડિયાની શરૂઆતમાં, પુણે ગ્રામીણ પોલીસની એક ટીમ ખેડૂતોને કથિત રીતે ધમકી આપવાના આરોપમાં પૂજા ખેડકરની માતા સામે નોંધાયેલા ગુનાના સંબંધમાં તેમના ઘરની મુલાકાત લીધી હતી. પૂજા ખેડકરની માતા મનોરમા સામે એફઆઈઆર દાખલ કરવામાં આવી હતી જ્યારે તેણીએ ખેડૂત પર બંદૂક બતાવી હોવાનો વીડિયો સોશિયલ મીડિયા અને ટેલિવિઝન ચેનલો પર સામે આવ્યો હતો.
ખેડૂત પંઢરીનાથ પાસલકર (૬૫) ની ફરિયાદના આધારે, પૂજાની માતા મનોરમા અને પિતા દિલીપ ખેડકર, હવેલીના અંબી ગામના અંબાદાસ ખેડકર અને અન્ય અજાણ્યા લોકો વિરુદ્ધ પુણે ગ્રામ્યના પૌડ પોલીસ સ્ટેશનમાં એફઆઈઆર દાખલ કરવામાં આવી હતી. ત્યારે પોલીસે કહ્યું હતું કે, પૂજાના માતા-પિતા ઘરે મળ્યા નથી અને તપાસ માટે તેમનો સંપર્ક કરવાનો પ્રયાસ કરવામાં આવી રહ્યો છે. પૂજા પર અધર બેકવર્ડ ક્લાસ (OBC) અને બેન્ચમાર્ક ડિસેબિલિટીઝ (PwBD) ક્વોટાનો દુરુપયોગ કરવાનો આરોપ છે.
અગાઉ, થોડા દિવસો પહેલા, પોલીસે પૂજા ખેડકરના માતા-પિતા મનોરમા અને દિલીપ ખેડકર વિરુદ્ધ એક વીડિયોના સંબંધમાં રિપોર્ટ દાખલ કર્યો હતો. મનોરમાને કથિત રીતે પૂણે જિલ્લાના મુલશી તાલુકામાં જમીન વિવાદને પગલે કેટલાક લોકોને પિસ્તોલથી ધમકાવતી જોવા મળી હતી. અધિકારીના જણાવ્યા અનુસાર આ ઘટના મહારાષ્ટ્ર સરકારના નિવૃત્ત કર્મચારી દિલીપ ખેડકર દ્વારા ખરીદેલી જમીન સાથે સંબંધિત છે. સ્થાનિક લોકોનો આરોપ છે કે, ખેડકરે પડોશી ખેડૂતોની જમીન પર દબાણ કર્યું હતું.