આવી રહ્યું છે ‘દાના’ વાવાઝોડું

ચક્રવાતી તોફાન દાના આગામી ૨૪ કલાકમાં દરિયાકાંઠે ત્રાટકી શકે છે. હવામાન વિભાગે ઓડિશા અને પશ્ચિમ બંગાળમાં રેડ એલર્ટ જાહેર કરી દીધું છે. બંને રાજ્યોની સરકારોએ તોફાનને પહોંચી વળવા માટે સંપૂર્ણ તૈયારી કરી લીધી છે. લોકોને સલામત સ્થળે ખસેડવામાં આવ્યા છે.

દેશના બે રાજ્યો ઓડિશા અને પશ્ચિમ બંગાળ માટે આગામી ૨૪ કલાક ખૂબ જ ખતરનાક સાબિત થવાના છે, કારણ કે પૂર્વ-મધ્ય બંગાળની ખાડી પર બનેલું ચક્રવાતી તોફાન દાના તબાહી મચાવવા માટે તૈયાર છે. આજે ૨૪ ઓક્ટોબરની સાંજથી આવતીકાલે ૨૫ ઓક્ટોબરની સવાર સુધી આ વાવાઝોડું ઓડિશાના પુરીના દરિયાકાંઠે ટકરાશે. તેની અસરની આગાહી કરતા, હવામાન વિભાગ (IMD) એ ઓડિશા અને પશ્ચિમ બંગાળમાં રેડ એલર્ટ જાહેર કર્યું છે.

ચક્રવાત દાનાની અસર ૬ રાજ્યોને થશે. કેરળ, તમિલનાડુ, કર્ણાટક અને આંધ્રપ્રદેશમાં પણ છેલ્લા કેટલાક દિવસોથી ભારે વરસાદ પડી રહ્યો છે. ગઈકાલથી ઓડિશા અને પશ્ચિમ બંગાળના દરિયાકાંઠાના વિસ્તારોમાં તોફાની પવન સાથે ભારે વરસાદ થઈ રહ્યો છે. આજે અને આવતીકાલે આ તોફાન ઓડિશા અને પશ્ચિમ બંગાળમાં તબાહી મચાવી શકે છે. હવામાન વિભાગના એલર્ટને ધ્યાનમાં રાખીને બંને રાજ્યોની સરકારોએ પણ પરિસ્થિતિને પહોંચી વળવા માટે તૈયારીઓ કરી લીધી છે.