આજે સવારે ૧૪ માર્ચના રોજ લદ્દાખ અને જમ્મુ-કાશ્મીર ઉપરાંત અરુણાચલ પ્રદેશમાં ભૂકંપના આંચકા અનુભવાયા હતા.
હોળીના દિવસે ભારતના ઉત્તરીય ભાગમાં વહેલી સવારે ભૂકંપના આંચકા અનુભવાયા હતા. લદ્દાખના કારગિલમાં ૫.૨ ની તીવ્રતાનો ભૂકંપ આવ્યો. આ ભૂકંપના આંચકા સવારે ૦૨:૫૦ વાગ્યે અનુભવાયા હતા. કારગિલની સાથે આ ભૂકંપના આંચકા સમગ્ર લદ્દાખ અને જમ્મુ અને કાશ્મીરના કેટલાક ભાગોમાં અનુભવાયા હતા.
રાષ્ટ્રીય ભૂકંપ વિજ્ઞાન કેન્દ્ર અનુસાર ભૂકંપનું કેન્દ્ર ૧૫ કિલોમીટરની ઊંડાઈએ હતું. આ ભૂકંપના માત્ર ત્રણ કલાક પછી ઉત્તર-પૂર્વ ભારતમાં પણ ભૂકંપના આંચકા અનુભવાયા. અરુણાચલ પ્રદેશના પશ્ચિમ કામેંગ વિસ્તારમાં ૪.૦ ની તીવ્રતાનો ભૂકંપ આવ્યો હતો. સવારે ૦૬:૦૦ વાગ્યે અહીં ભૂકંપના આંચકા અનુભવાયા હતા. તો ગઈકાલે ૧૩ માર્ચે બપોરે ૦૨:૦૦ વાગ્યે તિબેટમાં પણ ૪.૩ની તીવ્રતાનો ભૂકંપ આવ્યો હતો.
લેહ અને લદ્દાખ બંને ભૂકંપ ઝોન-IV માં આવે છે. જેનો અર્થ એ થાય કે ભૂકંપની દ્રષ્ટિએ આ વિસ્તારો ખૂબ જ જોખમી છે. ટેક્ટોનિકલી સક્રિય હિમાલય ક્ષેત્રમાં સ્થિત હોવાથી લેહ અને લદ્દાખમાં વારંવાર ભૂકંપ આવે છે.
