ભારત અને બાંગ્લાદેશ વચ્ચે સંરક્ષણ સહયોગ વધારવાના હેતુથી ગત વર્ષે કરાયેલા એક મહત્વપૂર્ણ કરારને બાંગ્લાદેશ સરકારે રદ કરી દીધો છે. બાંગ્લાદેશ માટે ૮૦૦ ટનની આધુનિક દરિયાઈ ટગ બોટ બનાવવા માટે કોલકાતા સ્થિત ગાર્ડન રીચ શિપબિલ્ડર્સ એન્ડ એન્જિનિયર્સ (GRSE) સાથે ૨૧ મિલિયન ડૉલર (લગભગ રૂ. ૧૮૦ કરોડ)નો સોદો થયો હતો.
કરાર જુલાઈ ૨૦૨૪ માં બાંગ્લાદેશની રાજધાની ઢાકામાં બાંગ્લાદેશ નૌકાદળના સંરક્ષણ ખરીદી મહાનિર્દેશાલયના અધિકારીઓ અને GRSE વચ્ચે હસ્તાક્ષર દ્વારા કરવામાં આવ્યો હતો. આ સોદો ભારત દ્વારા બાંગ્લાદેશને આપવામાં આવેલી ૫૦૦ મિલિયન ડૉલરની સંરક્ષણ લાઇન ઓફ ક્રેડિટ હેઠળનો પ્રથમ મોટો પ્રોજેક્ટ હતો, જે ૨૦૨૩ માં અમલમાં આવ્યો હતો.
ટગ બોટ વિશે વાત કરીએ તો તે ૬૧ મીટર લાંબી બનાવવાની હતી અને તેની મહત્તમ ગતિ ૧૩ નોટ્સ (લગભગ ૨૪ કિમી/કલાક) સંપૂર્ણ લોડિંગ સાથે હોત. કરાર મુજબ, તેનું નિર્માણ અને ડિલિવરી ૨૪ મહિનાની અંદર થવાનું હતું. આ સોદા સાથે, ભારતીય નૌકાદળના વડા એડમિરલ દિનેશ કે. ત્રિપાઠીએ પણ બાંગ્લાદેશની મુલાકાત લીધી હતી, જેનો ઉદ્દેશ્ય સંરક્ષણ સહયોગને વધુ ગાઢ બનાવવા અને દરિયાઈ ભાગીદારીના નવા માર્ગો શોધવાનો હતો.
