વેક્સિનેશનને વેગ આપવા માટે રાજ્ય સરકાર અને આરોગ્ય વિભાગ દ્વારા સતત પ્રયત્નો કરવામાં આવી રહ્યાં છે. ગુજરાતમાં અમદાવાદની જેમ રાજકોટમાં ખાનગી હોસ્પિટલને રસીકરણની મંજૂરી આપવામાં આવી છે. રાજકોટની HCG હોસ્પિટલમાં અંદાજે એક હજારમાં વેક્સિન મૂકી આપવામાં આવશે. એડિશનલ કલેક્ટર પરિમલ પંડ્યા સાથેની વાતચીતમાં જણાવ્યું હતું કે, આરોગ્ય સચિવની વીસી યોજાઇ હતી અને તેમાં આપણા રાજકોટ જિલ્લામાં 45થી વધુ ઉંમરના હજારો લોકોને રસીકરણ બાકી હોય તે ઝડપી બનાવવા અંગે ખાસ સુચના અપાય છે. અમદાવાદની જેમ હવે રાજકોટમાં પણ ખાનગી હોસ્પિટલને રસીકરણ માટે મંજૂરી અપાય છે. આથી હવે વેક્સિનનો વેપાર પણ રાજકોટ ચાલુ થઇ જશે.
કારખાનેદારો પોતાના ખર્ચે HCGમાં કામદારોને રસી મૂકાવશે
પરિમલ પંડ્યાએ વધુમાં જણાવ્યું હતું કે, સરકારની સીધી સુચના બાદ રાજકોટમાં 150 ફૂટ રિંગ રોડ ઉપર આવેલી ખાનગી HCG હોસ્પિટલને રસીકરણ માટે કલેક્ટરે મંજૂરી આપી છે, તેઓ આજથી રસીકરણ કરશે અથવા કાલથી જે હોસ્પિટલ નક્કી કરશે. લગભગ અમદાવાદની જેમ 1 હજાર રૂપિયા ભાવ રહેશે. આ હોસ્પિટલમાં રસીકરણ અંગે અમે ઇન્ડસ્ટ્રીયલ એસો.ના હોદ્દેદારોને બોલાવી તેમના કામદારોને ઝડપથી રસી અપાય તેવી અપીલ કરી રહ્યા છીએ. કારખાનેદારો જે તે કામદારને પોતાના ખર્ચે HCGમાં રસી અપાવશે.