અયોધ્યામાં શ્રી રામ મંદિરનાં પ્રાણ પ્રતિષ્ઠા મહોત્સવ પહેલા કેનેડા સરકારનો મહત્વનો નિર્ણય

કેનેડાના ઓન્ટારિયોમાં ઓકવિલે અને બ્રામ્પટન શહેરોએ અયોધ્યામાં મંદિરના ભવ્ય ઉદઘાટનની ઉજવણી કરવા માટે ૨૨ જાન્યુઆરી, ૨૦૨૪ ને “અયોધ્યા રામ મંદિર દિવસ’ તરીકે જાહેર કર્યો હતો .

બ્રેમ્પટનના મેયર, પેટ્રિક બ્રાઉન અને ઓકવિલે, રોબ બર્ટને જણાવ્યું હતું કે અયોધ્યામાં મંદિરનું ઉદ્ઘાટન “વિશ્વભરના હિંદુઓ માટે અત્યંત સાંસ્કૃતિક, ધાર્મિક અને ઐતિહાસિક મહત્વ ધરાવે છે, જે સદીઓ જૂના સ્વપ્નની પરાકાષ્ઠા દર્શાવે છે”.

તેઓએ એમ પણ કહ્યું કે રામ મંદિરનું ઉદઘાટન એ “શાંતિ, એકતા અને સંવાદિતાના મૂલ્યોનું પ્રમાણપત્ર છે જે હિંદુ આસ્થા માટે અભિન્ન છે” અને આ દિવસની ઉજવણી સમુદાય માટે મહત્વપૂર્ણ પ્રસંગ “આ સાંસ્કૃતિક મહત્વને માન આપવાની તક તરીકે સેવા આપશે.”

બંને મેયરોએ પોતપોતાના શહેરવાસીઓને અયોધ્યામાં મંદિરના ઉદઘાટનની “ઐતિહાસિક ઘટના”ની ઉજવણી કરવા હાકલ કરી હતી.

મિલ્ટનના મેયર, ગોર્ડ ક્રાન્ત્ઝે પણ આ પ્રસંગે હિન્દુ સમુદાયને શુભેચ્છા પાઠવી હતી અને કહ્યું હતું કે, “આ દિવસ તમારા માટે શાંતિ, એકતા અને વિચારશીલ પ્રતિબિંબની પુષ્કળતા લાવે.”

હિન્દુ કેનેડિયન ફાઉન્ડેશને એમ પણ કહ્યું કે બ્રાન્ટફોર્ડે ૨૨ જાન્યુઆરીને ‘”અયોધ્યા રામ મંદિર દિવસ’ તરીકે જાહેર કર્યો. ૨૦૨૧ ની વસ્તી ગણતરી મુજબ, ૮૩૦,૦૦૦ લોકો અથવા કેનેડામાં કુલ વસ્તીના ૨.૩ % લોકોએ કહ્યું કે તેઓ હિન્દુ છે. અયોધ્યામાં રામ મંદિરના પ્રાણ પ્રતિષ્ઠા સમારોહનું નેતૃત્વ વડા પ્રધાન નરેન્દ્ર મોદી કરશે અને તેમાં દેશભરમાંથી અસંખ્ય સાધુઓ ઉપરાંત ઘણા VVIP હાજરી આપશે.