ટીમ ઈન્ડિયાનો ભાવિ કેપ્ટન

શ્રીલંકા પ્રવાસ માટે જે ટીમની જાહેરાત કરવામાં આવી છે તેમાં ભારતીય ક્રિકેટના ભવિષ્યની છબી દેખાઈ રહી છે. ટી-૨૦  ની કેપ્ટનશીપ માટે હાર્દિક પંડ્યા અને સૂર્યકુમાર યાદવની ચર્ચા થઈ રહી હતી ત્યારે રિષભ પંતને પણ દાવેદાર માનવામાં આવી રહ્યો હતો. પરંતુ સૂર્યકુમાર યાદવના નામને મંજૂરી મળી હતી.

બીજી તરફ પસંદગીકારોએ પણ શુભમન ગિલને મોટી જવાબદારી આપીને ચોંકાવી દીધા હતા. નવા કોચ ગૌતમ ગંભીરની દેખરેખ હેઠળ ગિલને મોટું પ્રમોશન મળ્યું છે. શુભમન હવે ટી-૨૦ અને ODI ફોર્મેટમાં શ્રીલંકા પ્રવાસ માટે ટીમ ઈન્ડિયાનો ઉપ-કેપ્ટન છે. ટી-૨૦ માં તે સૂર્યકુમાર યાદવનો નાયબ હશે અને વનડેમાં તે રોહિત શર્મા પછી ટીમમાં નંબર-2 હશે. આવી સ્થિતિમાં, એવું માનવામાં આવે છે કે શુભમન ગિલ ભાવિ કેપ્ટન છે. ગિલે તાજેતરની ઝિમ્બાબ્વે શ્રેણી દરમિયાન સિનિયરોની ગેરહાજરીમાં ટીમ ઈન્ડિયાની કપ્તાની સંભાળી હતી.

આખરે ગીલને વાઇસ કેપ્ટનશીપ કેમ આપવામાં આવી? તો તેનું એક કારણ તેની ઉંમર છે. વનડે અને ટેસ્ટ કેપ્ટન રોહિત શર્મા હાલમાં ૩૭ વર્ષનો છે. નવા ટી-૨૦ કેપ્ટન સૂર્યાની ઉંમર 33 વર્ષ છે. દરમિયાન, શુભમન ગિલ હાલમાં ૨૪ વર્ષનો છે. આવી સ્થિતિમાં ગિલ પાસે કેપ્ટનશિપના મામલે વધુ પરિપક્વ થવાની તક છે. ભારતને સૂર્યા અને રોહિત પછી કેટલાક ખેલાડીની જરૂર હોવાથી આ પરિબળ તેમની સાથે જાય છે.

હવે સવાલ એ છે કે શુબમન ગિલ પંડ્યા અને રિષભ પંત જેવા ખેલાડીઓને હરાવીને ટીમ ઈન્ડિયાનો વાઇસ કેપ્ટન કેવી રીતે બન્યો. કાર અકસ્માત બાદ પંતે પુનરાગમન કર્યું છે ત્યારે પંડ્યાની ફિટનેસ પર પણ સવાલો ઉભા થયા છે. આવી સ્થિતિમાં, ગિલનું નામ વધુ સારા વિકલ્પ તરીકે ઉભરી આવ્યું છે, જેમાં પંજાબનો આ ક્રિકેટર અન્ય કરતા આગળ દેખાઈ રહ્યો છે. ગીલની કેપ્ટનશીપમાં જ ટીમ ઈન્ડિયાએ ઝિમ્બાબ્વે સામેની ટી-૨૦ શ્રેણી ૪-૧થી જીતી હતી. આ સિરીઝની ૫ મેચમાં ગિલે ૪૨.૫૦ ની એવરેજથી ૧૭૦ રન બનાવ્યા છે.

શુભમન ગિલ ઈન્ડિયન પ્રીમિયર લીગ (IPL)માં ગુજરાત ટાઇટન્સ (GT)ની કેપ્ટનશીપ કરી રહ્યો છે. જો કે, ગુજરાત ટાઇટન્સની કેપ્ટનશીપ કરતી વખતે, IPL ૨૦૨૪ માં શુભમન ગિલનું પ્રદર્શન એટલું સારું નહોતું. ગિલે IPLની ૧૨ મેચોમાં ૩૮.૭૨ની એવરેજથી ૪૨૬ રન બનાવ્યા હતા. જ્યારે ગુજરાતની ટીમ પોઈન્ટ ટેબલમાં 8મા સ્થાને હતી.