જમ્મુ-કાશ્મીર વિધાનસભા ચૂંટણીના ત્રીજા અને છેલ્લા તબક્કાનું મતદાન આજે પૂર્ણ થયું છે. સાંજે ૦૫:૦૦ વાગ્યા સુધી ૬૫.૪૮ % મતદાન થયું હતું. કેન્દ્રશાસિત પ્રદેશના ૩૯.૧૮ લાખથી વધુ મતદારો ૪૧૫ ઉમેદવારોના ભાવિનો નિર્ણય કરશે. આ ઉમેદવારોમાં બે પૂર્વ ઉપમુખ્યમંત્રી તારા ચંદ અને મુઝફ્ફર બેગનો પણ સમાવેશ થાય છે.
જમ્મુ-કાશ્મીર વિધાનસભા ચૂંટણી ૨૦૨૪ના ત્રીજા તબક્કાનું મતદાન મંગળવારે શાંતિપૂર્ણ રીતે પૂર્ણ થયું. આ તબક્કામાં સાત જિલ્લાની ૪૦ બેઠકો માટે મતદાન કરવામાં આવ્યું હતું. આ સાથે ત્રીજા તબક્કામાં ૪૧૫ ઉમેદવારોનું ભાવિ ઈવીએમમાં સીલ થઈ ગયું હતું. ત્રીજા રાઉન્ડમાં સૌથી વધુ ૧૧ બેઠકો જમ્મુ જિલ્લામાં હતી. ત્યાર બાદ બારામુલ્લામાં ૭, કુપવાડા અને કઠુઆમાં ૬-૬, ઉધમપુરમાં ૪ અને બાંદીપોરા અને સાંબામાં ૩-૩ વિધાનસભા બેઠકો હતી જ્યાં મંગળવારે મતદાન થયું હતું.
ચૂંટણી પંચના જણાવ્યા પ્રમાણે સાંજે ૦૫:૦૦ વાગ્યા સુધી ૬૫.૪૮ % લોકોએ પોતાના મતાધિકારનો ઉપયોગ કર્યો છે. જેમાં ઉધમપુરમાં સૌથી વધુ ૭૨.૯૧ % મતદાન નોંધાયું હતું. જ્યારે બારામુલ્લામાં સૌથી ધીમી ગતિ ૫૫.૭૩ % મતદાન નોંધાયું હતું. જોકે, અંતિમ આંકડાઓ આવશે ત્યારે મતદાનની ટકાવારીમાં ફેરફાર થઈ શકે.
આ પહેલા ૨૫ સપ્ટેમ્બરે બીજા તબક્કામાં જમ્મુ-કાશ્મીરના છ જિલ્લામાં ૫૭.૩૧ % મતદાન થયું હતું. ૧૮ સપ્ટેમ્બરે યોજાયેલા પ્રથમ તબક્કામાં ૬૧.૩૮ % મતદાન થયું હતું.
