ઉત્તર પ્રદેશના પ્રયાગરાજમાં છેલ્લા ૪૫ દિવસી યોજાઈ રહેલા મહાકુંભ મેળાનો આજે છેલ્લો દિવસ છે. હવે ૧૪૪ વર્ષ પછી પ્રયાગરાજમાં મહાકુંભ મેળો ભરાશે, એવામાં ક્લાઈમેટ એક્ટિવિસ્ટ સોનમ વાંગચુકે એક ચેતવણી (સોનમ વાંગચુકે પીએમ મોદીને લખ્યો પત્ર) વ્યક્ત કરી છે. સોનમ વાંગચુકે વડા પ્રધાન નરેન્દ્ર મોદીને એક જાહેર પત્ર લખીને આશંકા વ્યક્ત કરી છે કે આગામી મહાકુંભ રેતી પર યોજાઈ શકે છે, કારણ કે નદીઓ સુકાઈ જશે.
સોનમ વાંગચુક લદ્દાખમાં ગ્લેશિયર્સને બચાવવા માટે વર્ષોથી અભિયાન ચલાવી રહ્યા છે, તેઓ પર્યાવરણ બચાવવા માટે લોકોને પ્રેરણા આપતા રહે છે. સોનમ વાંગચુકે પત્રમાં હિમાલયના ગ્લેશિયર ઝડપથી પીગળવા તરફ વડા પ્રધાન નરેન્દ્ર મોદીનું ધ્યાન દોરવા પ્રયાસ કર્યો. નોંધનીય છે કે હિમાલયના ગ્લેશિયર્સ ઉત્તર ભારતની મોટી નદીઓના સ્ત્રોત છે.
વાંગચુકે સૂચન કર્યું કે ભારતે ગ્લેશિયર્સના સંરક્ષણમાં આગેવાની લેવી જોઈએ. તેમણે પોતાના પત્રમાં જણાવ્યું કે, “ભારતે ગ્લેશિયર્સના સંરક્ષણમાં આગેવાની લેવાની જરૂર છે કારણ કે આપણી પાસે હિમાલય છે, અને ગંગા અને યમુના જેવી આપણી પવિત્ર નદીઓ ત્યાંથી જ નીકળે છે.”
વાંગચુકે વડા પ્રધાનની વિવિધ પર્યાવરણીય પહેલોની પ્રશંસા પણ કરી અને હિમાલયના ગ્લેશિયર્સની સ્થિતિનું મૂલ્યાંકન કરવા માટે એક કમિશન સ્થાપવા વિનંતી કરી.
વાંગચુકે દુઃખ વ્યક્ત કરતા લખ્યું કે લોકોમાં આ મુદ્દા પર ખૂબ ઓછી જાગૃતિ છે.
યુનાઈટેડ નેશન્સે વર્ષ ૨૦૨૫ ને “આંતરરાષ્ટ્રીય ગ્લેશિયરસ સંરક્ષણ વર્ષ” તરીકે જાહેર કર્યું છે.
