કોંગ્રેસ અધિવેશનમાં કોંગ્રેસ નેતા રાહુલ ગાંધીએ કોંગ્રેસના ઈતિહાસનો મુદ્દો છેડ્યો હતો

‘તો બીજી તરફ બાંગ્લાદેશની વચગાળાની સરકારના સલાહકાર મોહમંદ યુનુસ અને પીએમ મોદીની મુલાકાતને લઇને રાહુલ ગાંધીએ જોરદાર પ્રહાર કર્યા. રાહુલ ગાંધીએ કહ્યું કે બાંગ્લાદેશ ભારત વિરૂદ્ધ નિવેદન આપી રહ્યું છે. ભારતના વડાપ્રધાન ત્યાંના નેતાને મળ્યા. તેમના મોંઢામાંથી એકપણ શબ્દ નીકળ્યો નહી. ક્યાં ગઇ ૫૬ ઇંચની છાતી.’

કોંગ્રેસ સાંસદ રાહુલ ગાંધીએ વધુમાં કહ્યું હતું કે ‘તેલંગાણામાં જાતિ ગણતરી કરવા માટે અમે એક ક્રાંતિકારી પગલું ભર્યું છે. અમારે જાણવું હતું કે આ દેશમાં કોની કેટલી ભાગીદારી છે. મેં સંસદમાં પીએમ મોદીને કહ્યું હતું કે તમે જાતિ ગણતરી કરાવો. દેશને ખબર હોવી જોઇએ કે કેટલા દલિત છે, કેટલા પછાત છે, ગરીબ જનરલ વર્ગના લોકો કેટલા છે.

પીએમ મોદી અને આરએસએસએ સ્પષ્ટ કરી દીધું કે અમે જાતિ આધારિત વસતી ગણતરી કરાવવા માંગતા નથી. અમે સંતાડવા માંગીએ છીએ. મેં કહ્યું કે, તમે છુપાવવું હોય એટલું છુપાવો. અમે અહીંથી જાતિ આધારિત વસતી ગણતરી પાસ કરીશું. હું ફરીથી કહી રહ્યો છું કે 50 ટકા અનામતની જે દીવાલ છે તેને અમે તોડી દઇશું. અમે જે તેલંગાણામાં કર્યું તે દિલ્હીમાં અને આખા ભારતમાં કરવા જઇ રહ્યા છીએ.’

દાદી ઈન્દિરા ગાંધીને યાદ કરતા રાહુલ ગાંધીએ કહ્યું હતું કે, ‘એકવાર મેં ઈન્દિરા ગાંધીજીને સવાલ પૂછ્યો હતો કે, તમે દુનિયામાં ન હોવ, ત્યારે લોકોએ તમારા વિશે શું બોલવું કે વિચારવું જોઈએ? આ વાતનો જવાબ આપતા તેમણે હતું કે, રાહુલ, હું માત્ર મારું કામ કરું છું. હું ના હોઉં ત્યારે લોકો મારા વિશે શું વિચારે છે તેની મને ચિંતા નથી. મારું ફોકસ માત્ર કામ પર છે. હું ના હોઉં ત્યારે દુનિયા મને ભૂલી જાય, તો મને મંજૂર છે, કારણ કે મેં પોતાનું કામ બરાબર રીતે કર્યું છે. લોકો શું વિચારે છે, તેનાથી મને ફરક પડતો નથી.’

રાહુલ ગાંધીએ કહ્યું કે આ લોકો ભારતની તમામ સંસ્થાઓ પર આક્રમણ કરી રહ્યા છે. પછાત અને દલિતોને જ્યાં સ્થાન મળતું હતું, ત્યાંના રસ્તા બંધ કરી રહ્યા છે. પહેલાં દરેક સમાજના યુવાનો સેનામાં જઇ શકતા હતા. તેમને પગાર, પેન્શન, એક્સ-સર્વિસમેનનો દરજ્જો મળતો હતો. બધુ ખતમ કરી દીધું.  ‘આજે અમારી સરકાર યુવાનોને કહે છે કે તમે યુદ્ધમાં શહીદ થશો, જો તમે અગ્નિવીર હશો તો તમને શહીદનો દરજ્જો અને પેન્શન આપીશું નહી. તમારી સાથે જે લડી રહ્યા છે તેમને મળશે, તમને નહી. દલિત, પછાત, અતિ-પછતને નુકસાન થઇ રહ્યું છે.’

રાહુલ ગાંધીએ અદાણી-અંબાણી પર પ્રહાર કરતાં કહ્યું કે હવે બધા બિઝનેસ અદાણી અને અંબાણીને મળી રહ્યા છે. અદાણી અને અંબાણીની કંપનીની મેનેજમેન્ટ લિસ્ટ નિકાળો તો એક પણ દલિત, આદિવાસી અને પછાત મળશે નહી. ૯૦ % લોકો માટે કશું વધ્યું નથી. તેમને ફક્ત ગરીબી અને બેરોજગારી મળી છે. 

રાહુલ ગાંધીએ ભાજપ અને સંઘ પર નિશાન સાધતાં કહ્યું હતું કે, ‘તે સંસ્થાઓ પર આક્રમણ કરી રહ્યા છે. આખા દેશની સંપત્તિ અદાણી-અંબાણીને અપાઈ રહી છે, બંધારણમાં એવું ક્યાંય નથી લખ્યું કે બધું ધન બે-ત્રણ લોકોના હાથમાં જ જવું જોઈએ. સંવિધાનમાં એવું ક્યાંય લખ્યું નથી કે દેશના તમામ ચાન્સલર આરએસએસના હોવા જોઇએ? સંવિધાનમાં ક્યાંય એવું લખ્યું નથી કે કોઇ ખાસ ભણાવવામાં આવશે. જે પાર્ટીની પાસે વિચારધારા, સ્પષ્ટતા નથી, તે ભાજપ અને આરેસએસના સામે ઉભી રહી શકે નહી. જેની પાસે વિચારધારા છે, તે ભાજપ અને આરએસએસ સામે ઉભી રહી શકે, તે તેમને હરાવશે.’