કોરોના વાયરસથી સંક્રમિત રાષ્ટ્રીય લોકદળ (RLD) પ્રમુખ અને પૂર્વ વડાપ્રધાન ચૌધરી ચરણ સિંહના દીકરા અજીત સિંહનું ગુરુવારે વહેલી સવારે નિધન થઈ ગયું છે. 82 વર્ષના ચૌધરી અજીત સિંહે ગુરુગ્રામની એક ખાનગી હોસ્પિટલમાં અંતિમ શ્વાસ લીધા હતા. તેઓ છેલ્લા ઘણાં દિવસોથી કોરોનાથી સંક્રમિત હતા. ફેફસામાં સંક્રમણ ફેલાવાના કારણે તેમને નિમોનિયા થયો હતો. ડોક્ટર્સે જણાવ્યું કે, છેલ્લાં બે દિવસથી તેમની સ્થિતિ ગંભીર હતી.
જાટ સમુદાયના મોટા નેતા હતા ચૌધરી અજીત સિંહ
અજીત સિંહનો દબદહો પશ્ચિમી ઉત્તર પ્રદેશમાં ઘણો જોવા મળતો હતો. તેઓ જાટના મોટા નેતા માનવામાં આવે છે. તેઓ ઘણી વાર કેન્દ્રીય મંત્રી પણ રહી ચૂક્યા છે. છેલ્લી 2 લોકસભા ચૂંટણી અને 2 વિધાનસભા ચૂંટણી દરમિયાન રાષ્ટ્રીય લોકદળનો ગ્રાફ ઝડપથી નીચે આવ્યો હતો. આ જ કારણથી તેઓ તેમના ગઢ બાગપતમાંથી લોકસભા ચૂંટણી હારી ગયા હતા. અજીત સિંહના દીકરા સુપુત્ર જયંત ચૌધરી પણ મથુરાથી લોકસભા સીટથી ચૂંટણી હાર્યા હતા.
રક્ષામંત્રી રાજનાથ સિંહ, રાહુલ ગાંધી સહિત મોટા નેતાઓએ શોક વ્યક્ત કર્યો
RLD પ્રમુખ અને પૂર્વ કેન્દ્રીય મંત્રી ચૌધરી અજીત સિંહના નિધનથી સમગ્ર દેશમાં શોકની લાગણી ફેલાઈ ગઈ છે. રક્ષામંત્રી રાજનાથ સિંહે સોશિયલ મીડિયા પર લખ્યું છે, ચૌધરી અજીત સિંહના નિધનના સમાચાર ખૂબ પીડાદાયક છે. પોતાના લાંબા જાહેર જીવનમાં તેઓ હંમેશા જનતા અને જમીન સાથે જોડાયેલા રહ્યા. તે સાથે જ ખેડૂતો, મજૂરો અને અન્ય નિર્બળ વર્ગોના હિતો માટે ભારે સંઘર્ષ પણ કરતાં રહ્યા. અનેક શોકગ્રસ્ત પરિવારો અને સમર્થકો પ્રત્યે મારી સંવેદના. ઓમ શાન્તિ. બીજી બાજુ કોંગ્રેસ નેતા રાહુલ ગાંધી અને સમાજવાદી પાર્ટીએ તેમના ઓફિસશિયલ મીડિયા પ્લેટફર્મ દ્વારા ચૌધરી અજીત સિંહને શ્રદ્ધાજંલિ આપી છે.