સુરતમાં અઢી વર્ષની બાળકીની દુષ્કર્મ આચરી અને બેરહેમી રીતે હત્યા કરનાર ૩૮ વર્ષીય નરાધમને કોર્ટે માત્ર ૩૩ દિવસમાં સુનાવણી પૂર્ણ કરીને ફાંસીની સજાનો હુકમ કર્યો છે. ઉપરાંત બાળકીનાં માતા-પિતાને રૂપિયા ૨૦ લાખ ચૂકવવા આદેશ આપ્યો છે.
પોર્ન વીડિયો જોયા બાદ ગુડ્ડુ યાદવ નામના આરોપીએ બાળકી સાથે દુષ્કર્મ આચર્યું હતું. રાજ્ય સરકારે ભવિષ્યમાં દ્વારા આ પ્રકારના ગુના બને નહીં એ માટે દાખલો બેસાડવાના હેતુથી દુષ્કર્મના આરોપીઓની કરતૂત અને તેમને થયેલી સજાની વિગતો દર્શાવતા હોર્ડિંગ્સ રાજ્યમાં લગાવવાનો નિર્ણય લેવામાં આવ્યો છે, જેમાં આરોપીની તસવીર પણ હશે. રાજ્યમાં માસૂમ બાળકીઓ પર થતા દુષ્કર્મના કેસને સરકારે ગંભીરતાથી લઇને આરોપીને કડક અને તાત્કાલિક સજા મળે તેવા પ્રયાસ સફળ રહ્યા બાદ પોલીસના મનોબળમાં વધારો થયો છે.
ગૃહમંત્રી હર્ષ સંઘવીએ જાણાવ્યું હતું કે દુષ્કર્મની ઘટનાઓમાં કેન્દ્ર અને રાજ્ય સરકારે અસરકારક કામગીરી કરી છે. માત્ર એક માસમાં આવા ગંભીર ગુનામાં બેને ફાંસી સહિત ત્રણને કડક સજા કરવામાં સફળતા મળી છે, ત્યારે રાજ્યમાં આગામી સમયમાં આવા બનાવો ન બને તે માટે રાજ્ય સરકાર ખાસ એક્શન પ્લાન બનાવવા જઇ રહી છે. મોટાભાગના દુષ્કર્મના કેસમાં આરોપીઓ પોર્ન ફિલ્મો જોઇને આ પ્રકારનું જઘન્ય કૃત્ય આચરતા હોય છે જેથી શહેરોમાં મોબાઇલની દુકાનો દ્વારા પોર્ન વીડિયો કે ફિલ્મો ડાઉનલોડ કરી આપતા હોય ત્યાં પોલીસ ચાંપતી નજર રાખીને કાર્યવાહી કરશે.