સૌથી મહત્વપૂર્ણ નિર્ણયોમાં ઓનલાઈન ગેમિંગને GST હેઠળ લાવવા અને ૨૮ % ટેક્સ લાદવાનો અને કેન્સરની દવાઓમાંથી IGST દૂર કરવાનો સમાવેશ
GST કાઉન્સિલની બેઠકમાં લેવાયેલા નિર્ણયોની મંગળવારે જાહેરાત કરવામાં આવી હતી. નાણામંત્રી નિર્મલા સીતારમણની અધ્યક્ષતામાં આ બેઠક યોજાઈ હતી અને તેમાં લેવાયેલા સૌથી મહત્વપૂર્ણ નિર્ણયોમાં ઓનલાઈન ગેમિંગને GST હેઠળ લાવવા અને 28 ટકા ટેક્સ લાદવાનો અને કેન્સરની દવાઓમાંથી IGSTદૂર કરવાનો સમાવેશ થાય છે. ચાલો જાણીએ GST પર ક્યાં રાહત મળી અને શું થયું મોંઘું?
GST કાઉન્સિલની બેઠકમાં ઓનલાઈન ગેમિંગ, હોર્સ રેસિંગ, કેસિનોની સંપૂર્ણ કિંમત પર ૨૮ % GST લાદવાનો નિર્ણય લેવામાં આવ્યો છે. ઓનલાઈન ગેમિંગને GST કાયદાના દાયરામાં લાવવામાં આવ્યું છે. ઓનલાઈન ગેમિંગ પર GST લાદવાના નિર્ણયની સ્પષ્ટતા કરતા નાણામંત્રી નિર્મલા સીતારમણે કહ્યું કે, આ મુદ્દા પર વિગતવાર ચર્ચા કર્યા બાદ આ નિર્ણય લેવામાં આવ્યો છે. ચર્ચા દરમિયાન આજના સમયમાં ઓનલાઈન ગેમિંગ ઈન્ડસ્ટ્રીની અસર કેટલી છે અને તેનાથી કેટલી આવક થઈ શકે છે. દરેક રાજ્ય સાથે આ તમામ પાસાઓ પર ચર્ચા કર્યા બાદ આ નિર્ણય લેવામાં આવ્યો છે.
GST કાઉન્સિલે કાર ગ્રાહકોને મોટો ઝટકો આપ્યો છે. બેઠક દરમિયાન વ્યાપક ચર્ચા-વિચારણા કર્યા પછી મલ્ટી પર્પઝ કાર (MUVs) પર ૨૨ % વળતર ઉપકર વસૂલવાની દરખાસ્તને મંજૂરી આપવામાં આવી છે, જે ૨૮ % GST ઉપરાંત હશે. એટલે કે હવે આ કેટેગરીના વાહનો ખરીદવા માટે વધુ ખર્ચ કરવો પડશે. જોકેનાણાપ્રધાન નિર્મલા સીતારમણે કહ્યું કે, સેડાન કાર પર ૨૨ % સેસ લાગુ નહીં થાય.
આયાતી કેન્સરની દવા પર IGST લાગશે નહીં. એટલે કે આ દવા સસ્તી થશે. GST કાઉન્સિલની આ બેઠકમાં કેન્સરની દવા Dinutuximabની આયાત સસ્તી થઈ શકે તેવી અપેક્ષા પહેલાથી જ હતી અને તેને સરકારે મંજૂરી આપી હતી. નોંધનીય છે કે, હાલમાં આના પર ૧૨ % IGST વસૂલવામાં આવે છે, જેને કાઉન્સિલ દ્વારા શૂન્ય કરવામાં આવ્યું છે. આ દવાના એક ડોઝની કિંમત ૬૩ લાખ રૂપિયા છે.
સિનેમા હોલમાં ફિલ્મો જોવાના શોખીન લોકો માટે ખાવા-પીવાની વસ્તુઓ સસ્તી થશે. વાસ્તવમાં બેઠકમાં લેવાયેલા નિર્ણયોની માહિતી આપતા મહેસૂલ સચિવ સંજય મલ્હોત્રાએ કહ્યું કે, સિનેમા હોલમાં ખાવા-પીવાની વસ્તુઓ પર જીએસટી ઘટાડવાનો નિર્ણય લેવામાં આવ્યો છે. બેઠક પહેલા સિનેમા હોલમાં ઉપલબ્ધ ખાદ્યપદાર્થો અને પીણાં પરનો GST ૧૮ %થી ઘટાડીને ૫ % કરવાનો પ્રસ્તાવ મૂકવામાં આવ્યો હતો. કાઉન્સિલની બેઠકમાં આ પ્રસ્તાવને પણ મંજૂરી આપવામાં આવી છે.
નાણામંત્રી નિર્મલા સીતારમણે GST ઘટાડવાની જાહેરાત કરી છે. તેમાંથી રાંધેલી વસ્તુઓ પર જીએસટી ૧૮ %થી ઘટાડીને ૫ % કરવામાં આવ્યો છે. એટલે કે હવે કાચા કે તળેલા નાસ્તાની ગોળીઓ સસ્તી કરવામાં આવી છે. આ સિવાય ઈમિટેશન, ઝરી દોરા પરનો ટેક્સ ૧૨ %થી ઘટાડીને ૫ % કરવામાં આવ્યો છે.