સઉદી ક્રાઉન પ્રિન્સની સાથે બ્લિન્કેનની ગઇકાલે સાંજે જ મુલાકાત થવાની હતી પરંતુ તેમ ન થયું : આજે સવારે મુલાકાત થઈ.
ઈઝરાયલ-હમાસ યુદ્ધને લીધે અમેરિકાની રાજદ્વારી મુશ્કેલીઓ વધી રહી છે. સઉદી અરબસ્તાન અને ઈજીપ્ત જેવા નિકટવર્તી દેશો પણ અમેરિકા સામે ગુસ્સે ભરાયા છે. અમેરિકાનાં તે અંગેના વલણને લીધે તેઓ નારાજ છે.
દરમિયાન અમેરિકાના વિદેશ મંત્રી એન્ટની બ્લિન્કેન આરબ દેશોની મુલાકાતે છે. તેના ભાગ રૂપે સઉદી અરબસ્તાન પહોંચેલા બ્લિન્કેનને સઉદી ક્રાઉન પ્રિન્સ મોહમ્મદ બિન સલમાને મુલાકાત માટે બ્લિન્કેનને કલાકો સુધી રાહ જોવડાવી હતી. તે ઉપરાંત ઈજીપ્તના નેતા અબ્દેલ ફતહ અલ સીરીએ અમેરિકાનાં વલણ અંગે નારાજગી બતાવી છે. સઉદી અરબસ્તાનના ક્રાઉન પ્રિન્સ વાસ્તવમાં બ્લિન્કેનને ગઇકાલે સાંજે મળવાના હતા. પરંતુ તેને બદલે છેક આજે સવારે મળ્યા.
અમેરિકાનું વલણ થોડું બદલાયું છે. તેણે ઈઝરાયલને ગાઝા ઉપર કબજો ન જમાવવા જણાવ્યું છે, મીટીંગનાં પ્રારંભે જ સઉદી પ્રિન્સે અમેરિકાને સ્પષ્ટ શબ્દોમાં કહી દીધું હતું કે, ઈઝરાયલ અંગે અમેરિકાનું વલણ ખોટું છે, ઈઝરાયલે આક્રમણ તો કરવું જ ન જોઈએ પરંતુ પોતાની સેનાને પણ હટાવી લેવી જોઈએ.
ઈઝરાયલનાં આક્રમણનો ભોગ નિર્દોષ પેેલેસ્ટાઇનીઓ બની રહ્યા છે. ગાઝા પટ્ટીમાં વીજળી અને પાણી પણ રોકવામાં આવ્યા છે. તેથી લોકો એક એક ટીપાં પાણી માટે પણ તરસે છે. આ પરિસ્થિતિ તુર્ત જ દૂર થવી જોઈએ, નહીં તો સમગ્ર આરબ વિસ્તારમાં તેની અસર પડશે.