પ્રિયંકા ગાંધીની મુશ્કેલીઓ વધશે

ચાર્જશીટમાં તેમના પતિ રોબર્ટ વાડ્રાના નામનો પણ સમાવેશ કરવામાં આવ્યો છે. જોકે ચાર્જશીટમાં પ્રિયંકાનું નામ અને રોબર્ટ વાડ્રાના નામનો આરોપી તરીકે સમાવેશ કરવામાં આવ્યો નથી.

કોંગ્રેસ પાર્ટીના મહાસચિવ પ્રિયંકા ગાંધીની મુશ્કેલીઓ વધી રહી છે. EDએ હરિયાણાના ફરીદાબાદમાં જમીન ખરીદવા સંબંધિત મામલામાં ચાર્જશીટમાં પ્રિયંકા ગાંધીનું નામ સામેલ કર્યું છે. ચાર્જશીટમાં તેમના પતિ રોબર્ટ વાડ્રાના નામનો પણ સમાવેશ કરવામાં આવ્યો છે. જોકે ચાર્જશીટમાં પ્રિયંકાનું નામ અને રોબર્ટ વાડ્રાના નામનો આરોપી તરીકે સમાવેશ કરવામાં આવ્યો નથી.

‘પ્રિવેન્શન ઓફ મની લોન્ડરિંગ એક્ટ’ (PMLA) સંબંધિત કેસની ચાર્જશીટમાં કોંગ્રેસ નેતા પ્રિયંકા ગાંધીના નામનો ઉલ્લેખ કરવામાં આવ્યો છે. એન્ફોર્સમેન્ટ ડિરેક્ટોરેટ (ED) એ કહ્યું છે કે રોબર્ટ વાડ્રા અને પ્રિયંકા ગાંધી વાડ્રાએ દિલ્હી સ્થિત રિયલ એસ્ટેટ એજન્ટ દ્વારા હરિયાણામાં જમીન ખરીદી હતી. આ એજન્ટે એનઆરઆઈ બિઝનેસમેન સીસી થમ્પીને જમીન પણ વેચી હતી.

EDની ચાર્જશીટમાં પહેલીવાર પ્રિયંકા ગાંધીનો ઉલ્લેખ કરવામાં આવ્યો છે.

સૂત્રોનું માનીએ તો EDની ચાર્જશીટમાં પહેલીવાર પ્રિયંકા ગાંધી વાડ્રાના નામનો ઉલ્લેખ કરવામાં આવ્યો છે. સીસી થમ્પી અને સુમિત ચઢ્ઢા વિરુદ્ધ દાખલ કરવામાં આવેલી ચાર્જશીટમાં પ્રિયંકા ગાંધીના નામનો ઉલ્લેખ કરવામાં આવ્યો છે. તપાસમાં સામે આવ્યું છે કે રોબર્ટ વાડ્રા અને થમ્પી સિવાય પ્રિયંકા ગાંધીએ પણ ફરીદાબાદમાં જમીન ખરીદી હતી. સંજય ભંડારીના નજીકના થમ્પી અને વાડ્રા વચ્ચેના નાણાકીય જોડાણની તપાસ દરમિયાન આ વાત સામે આવી છે.

મામલો શું છે

આ મામલો ફરીદાબાદમાં જમીનની ખરીદી સાથે જોડાયેલો છે. માહિતી અનુસાર, ૨૦૦૫-૨૦૦૬ વચ્ચે રોબર્ટ વાડ્રાએ ફરીદાબાદના અમીપુર ગામમાં એચએલ પાહવા પ્રોપર્ટી ડીલર દ્વારા લગભગ ૪૦.૮ એકર જમીન ખરીદી હતી, જે તેણે ડિસેમ્બર ૨૦૧૦માં પાહવાને પાછી વેચી દીધી હતી. એ જ રીતે, એપ્રિલ ૨૦૦૬માં આ જ અમીપુર ગામમાં પ્રિયંકા ગાંધી વાડ્રાના નામે એક ઘર ખરીદવામાં આવ્યું હતું, જે ફેબ્રુઆરી ૨૦૧૦માં પાહવાને વેચવામાં આવ્યું હતું. સૂત્રોના જણાવ્યા અનુસાર, પાહવા થમ્પીની ખૂબ નજીક છે, પાહવાએ જ અમીપુર ગામમાં થમ્પીની જમીન ખરીદી હતી.