દિવાળી બાદ કેન્દ્ર સરકારે જગતના તાતને મોટી ગિફ્ટ આપીને ખુશખુશાલ કરી દીધાં છે.
પીએમ કિસાન યોજનાના ૨૧ મા હપ્તા પહેલા, સરકારે ખેડૂતોને એક મોટી ભેટ આપી છે. ૨૮ ઓક્ટોબરના રોજ, કેન્દ્રીય મંત્રીમંડળે ખાતર વિભાગના પ્રસ્તાવને મંજૂરી આપી. સરકારે રવિ સિઝન માટે ફોસ્ફેટિક અને પોટાશિક (P&K) ખાતરો માટે પોષક તત્વો આધારિત સબસિડી (NBS) દર નક્કી કર્યા છે. તેમાં જણાવાયું છે કે રવિ સિઝન માટે અંદાજિત બજેટ ₹ ૩૭,૯૫૨.૨૯ કરોડ હશે. આનાથી ખેડૂતોને હવે સસ્તા ભાવે ખાતર મળશે તેની ખાતરી થશે.
પ્રધાનમંત્રી નરેન્દ્ર મોદીની અધ્યક્ષતામાં મળેલી મંત્રીમંડળે ચાલુ રવિ સિઝન માટે નાઇટ્રોજન (N) પર પ્રતિ કિલો રૂ. ૪૩.૦૨, ફોસ્ફરસ (P) પર પ્રતિ કિલો રૂ. ૪૭.૯૬, પોટાશ (K) પર પ્રતિ કિલો રૂ. ૨.૩૮ અને સલ્ફર (S) પર પ્રતિ કિલો રૂ. ૨.૮૭ ની સબસિડી દરોને મંજૂરી આપી છે.
માહિતી અને પ્રસારણ મંત્રી અશ્વિની વૈષ્ણવે પત્રકારોને જણાવ્યું હતું કે, “૨૦૨૫ ના રવિ પાક માટે મંજૂર કરાયેલી સબસિડી ગયા વર્ષ કરતાં લગભગ ૧૪,૦૦૦ કરોડ રૂપિયા વધુ છે. તેમણે કહ્યું કે આયાત કિંમત અને પોષક તત્વોની જરૂરિયાત, સબસિડીનો બોજ અને MRP જેવા અન્ય પરિબળોને ધ્યાનમાં રાખીને પોષણ આધારિત સબસિડી (NBS) યોજના હેઠળ સબસિડી દર નક્કી કરાયાં છે.
સબસિડી દર ૧ ઓક્ટોબરથી અમલમાં આવશે. દેશના ઘણા ભાગોમાં રવિ (શિયાળુ) વાવણી શરૂ થઈ ગઈ છે. આ સિઝનમાં ઘઉં, સરસવ અને ચણા મુખ્ય પાક છે. કેન્દ્ર સરકારની મંજૂરીથી ખેડૂતોને સબસિડીવાળા, સસ્તા અને વાજબી કિંમતના ખાતરો ઉપલબ્ધ થશે.
