હિમાચલ પ્રદેશ, ઉત્તરાખંડ અને જમ્મુ-કાશ્મીરના ઊંચાણવાળા વિસ્તારોમાં તાજી હિમવર્ષા બાદ ઠંડા પવનો હવે મેદાનો તરફ આગળ વધ્યા
ઉત્તર ભારતમાં શિયાળાનું આગમન થઈ ગયું છે. હિમાચલ પ્રદેશ, ઉત્તરાખંડ અને જમ્મુ-કાશ્મીરના ઊંચાણવાળા વિસ્તારોમાં તાજી હિમવર્ષા બાદ ઠંડા પવનો હવે મેદાનો તરફ આગળ વધ્યા છે. જેના પરિણામે દિલ્હી, પંજાબ, હરિયાણા, ઉત્તર પ્રદેશ અને રાજસ્થાનમાં ઠંડીનો પ્રભાવ વધ્યો છે. સવાર અને સાંજના તાપમાનમાં ઘટાડા સાથે હળવો ધુમ્મસ પણ દેખાવા લાગ્યો છે.
હિમાચલ પ્રદેશના ઊંચાઈવાળા વિસ્તારોમાં ગુરુવારે ભારે ઠંડીનો અનુભવ થયો. લાહૌલ-સ્પિતિ જિલ્લાના તાબોમાં લઘુત્તમ તાપમાન માઈનસ ૫.૫°C નોંધાયું જે આ સિઝનની અત્યાર સુધીની સૌથી ઠંડી રાત રહી. કીલોંગમાં માઈનસ ૩.૨°C, કુકુમસેરીમાં માઈનસ ૨.૧°C, અને કિન્નૌરના કલ્પામાં 0.૨°C તાપમાન નોંધાયું. કલ્પામાં સિઝનની પહેલી બરફવર્ષા થતા આસપાસના વિસ્તારોમાં ઠંડી વધુ તીવ્ર બની ગઈ છે.
જમ્મુ અને કાશ્મીરનો ગુલમર્ગ રાજ્યનો સૌથી ઠંડો વિસ્તાર રહ્યો. ગુલમર્ગ અને સોનમર્ગ સહિતના પર્યટન સ્થળોએ ભારે બરફવર્ષા થઈ. ગુલમર્ગનું લઘુત્તમ તાપમાન ૩.૨°C સુધી ઘટ્યું જે સામાન્ય કરતાં ૪.૯°C ઓછું હતું. પહેલગામમાં દિવસનું મહત્તમ તાપમાન ૧૩°C અને લઘુત્તમ તાપમાન માઈનસ ૧.૮°C નોંધાયું.
હવામાન નિષ્ણાતોના જણાવ્યા મુજબ પશ્ચિમી વિક્ષોભના કારણે ઉત્તરીય પર્વતીય વિસ્તારોમાં થયેલી હિમવર્ષાએ ઠંડા પવનોને મેદાનો તરફ ધકેલ્યા છે. દિલ્હીમાં ગુરુવારે લઘુત્તમ તાપમાન ૧૪°C નોંધાયું જે સામાન્ય કરતાં ૨°C ઓછું હતું. પંજાબના અમૃતસર અને હરિયાણાના અંબાલામાં તાપમાન ઘટીને ૧૧°C સુધી પહોંચ્યું છે. ઉત્તરાખંડના બદ્રીનાથ, કેદારનાથ અને ઔલી જેવા વિસ્તારોમાં બરફવર્ષા પછી તાપમાન શૂન્યથી નીચે ઉતરી ગયું છે.
બરફવર્ષા પછી અનેક પહાડી વિસ્તારોમાં પ્રવાસીઓની સંખ્યામાં વધારો જોવા મળી રહ્યો છે. ઔલી, મનાલી, શિમલા અને ગુલમર્ગમાં બરફના નજારાઓ માણવા લોકો ઉમટી રહ્યા છે. હવામાન વિભાગ ના મુજબ હિમાચલ પ્રદેશમાં ચોમાસા બાદની ઋતુ દરમિયાન અત્યાર સુધી ૬૯.૫ મીમી વરસાદ નોંધાયો છે જે સામાન્ય કરતાં ૧૪0% વધુ છે. જો આ જ પરિસ્થિતિ ચાલુ રહેશે તો નવેમ્બરના મધ્ય સુધી ઉત્તર ભારતના ઘણા વિસ્તારોમાં લઘુત્તમ તાપમાન ૧૦°Cથી નીચે પહોંચી શકે છે.
IMDએ ચેતવણી આપી છે કે, આગામી ૩૬ કલાક હવામાન માટે પડકારજનક બની શકે છે. ઉત્તર ભારતમાં ઠંડા પવનો અને ધુમ્મસનો પ્રભાવ વધશે જ્યારે દક્ષિણ અને ઉત્તરપૂર્વ ભારતમાં ભારે વરસાદ અને વીજળી સાથે વાવાઝોડાની સંભાવના છે.
