પહેલગામ હુમલા પછી પાકિસ્તાનમાં અચાનક ભય અને ગભરાટ ફેલાયો છે. શું ભારત ખરેખર સરહદ પાર કોઈ મોટું પગલું ભરવા જઈ રહ્યું છે?
પહેલગામ હુમલાની અસર પાકિસ્તાન પર ભારે રીતે દેખાઈ રહી છે. પાકિસ્તાનના સંરક્ષણ પ્રધાન ખ્વાજા આસિફે ખુલાસો કર્યો છે કે ભારત પાકિસ્તાન પર ફરીથી કોઈ મોટો હુમલો કરી શકે છે. તેમણે કહ્યું કે ભારતીય સેના પ્રમુખ દ્વારા આપવામાં આવેલ નિવેદનને હળવાશથી લઈ શકાય નહીં, કારણ કે ભારત હંમેશાં સરહદી કાર્યવાહી કરવાની સ્થિતિમાં રહે છે. આ નિવેદનોને કારણે પાકિસ્તાનમાં રાજકીય અને સુરક્ષાના વર્ગોમાં હલચલ મચી ગઈ છે.
એક ઇન્ટ્રવ્યુ દરમિયાન ખ્વાજા આસિફે અનેક વિવાદાસ્પદ અને પાયાવિહોણા દાવા કર્યા. તેમણે અફઘાનિસ્તાન પર આરોપ મૂક્યો કે ત્યાંથી ઘૂસણખોરીનું આયોજન થાય છે અને ભારત તેમાં મહત્વની ભૂમિકા ભજવે છે. આસિફે કહ્યું કે સાઉદી અરેબિયા, યુએઈ, ઈરાન, ચીન સહિત અનેક દેશો પાકિસ્તાનમાં થતી સરહદપાર ઘૂસણખોરીથી પરેશાન છે અને તેઓ આ પ્રવૃત્તિઓને રોકવા માંગે છે. આસિફ એટલા સુધી બોલ્યા કે અફઘાનિસ્તાનનું કાબુલ શહેર હવે આતંકવાદીઓ માટે કેન્દ્ર બની ગયું છે.
ભારતીય સેના પ્રમુખ જનરલ ઉપેન્દ્ર દ્વિવેદીની ટિપ્પણી પાકિસ્તાનને વધુ અસ્વસ્થ કરી રહી છે. દ્વિવેદીએ સ્પષ્ટપણે કહ્યું હતું કે “ઓપરેશન સિંદૂર તો ફક્ત એક ટ્રેલર હતું.” તેમણે ઉમેર્યું કે જો પાકિસ્તાન કોઈપણ પ્રકારની ઉશ્કેરણી કરશે તો ભારત તેને જવાબદાર રાષ્ટ્ર કેવી રીતે વર્તે તે અંગે પાઠ ભણાવવા તૈયાર છે. આ નિવેદનને પાકિસ્તાન સરકારે ખૂબ ગંભીરતાથી લીધો છે.
ખ્વાજા આસિફએ વધુમાં કહ્યું કે ભારત નથી ઇચ્છતું કે પાકિસ્તાન અને અફઘાનિસ્તાન પોતાના મતભેદો દૂર કરે. તેમનું કહેવું છે કે જો પાકિસ્તાન બે મોરચા ભારત અને અફઘાનિસ્તાન બંને સાથે તણાવમાં ફસાય, તો ભારત યુદ્ધના જોખમને ટાળી શકે. આસિફે સ્પષ્ટ કર્યું કે પાકિસ્તાન કેવી પણ પરિસ્થિતિમાં ભારત પર વિશ્વાસ કરી શકતું નથી અને ભારતમાં સરહદ પાર હુમલો કરવાની ક્ષમતા અને ઈચ્છા બંને છે.
આસિફે મધ્ય પૂર્વમાં પાકિસ્તાનની ભૂમિકા પર પણ ભાર મૂક્યો. તેમણે જણાવ્યું કે પાકિસ્તાને ગાઝામાં આંતરરાષ્ટ્રીય દળોનો ભાગ બનવું જોઈએ. તેમજ કહ્યું કે પાકિસ્તાન અબ્રાહમ કરારમાં સામેલ થવાનો કોઈ વિચાર નથી રાખતું અને બે-રાજ્ય ઉકેલ લાગુ ન થાય ત્યાં સુધી પાકિસ્તાન પોતાનો વલણ બદલશે નહીં.
પાકિસ્તાનની અંદરથી જ એક મોટો પર્દાફાશ થયો છે. ખૈબર પખ્તુનખ્વાના મુખ્યમંત્રી સોહેલ આફ્રિદીએ જણાવ્યું છે કે સરકારને ફાયદો થાય તે માટે “નકલી આતંકવાદી હુમલા” કરવામાં આવે છે. એક અહેવાલ મુજબ, આફ્રિદીએ ઇસ્લામાબાદ પર આરોપ મૂક્યો કે તે જાણબૂઝીને આવા હુમલાઓને પ્રોત્સાહન આપે છે, જેથી ખૈબર વિસ્તારમાં શાંતિની પ્રક્રિયા અસ્તવ્યસ્ત થાય. વધુમાં, તેમણે પાકિસ્તાન સેના પર પશ્તુન તહાફુઝ મૂવમેન્ટના સભ્યોના અપહરણનો આરોપ મૂક્યો અને કહ્યું કે આ સરકારની શાંતિ પહેલને પાટા પરથી ઉતારવાનો પ્રયાસ છે.
આફ્રિદીએ જણાવ્યું કે ખૈબર પખ્તુનખ્વામાં દાયકાઓથી જે દળો અસ્થિરતા જાળવી રાખે છે તે જ જૂથો લોકોના કલ્યાણ કરતાં પોતાના રાજકીય હિતને અગત્ય આપતા રહ્યાં છે. તેમણે કહ્યું કે ખૈબરના લોકો હવે આ નકલી આતંકવાદી હુમલા અને ગૂઢ નિર્ણયોથી કંટાળી ગયા છે. તેમનું નિવેદન પાકિસ્તાનની આંતરિક સુરક્ષા નીતિ પર ગંભીર પ્રશ્નચિહ્ન ઉભું કરે છે. પહેલગામ હુમલા પછી પાકિસ્તાનની આંતરિક રાજનીતિ, સુરક્ષા એજન્સીઓ અને પડોશી દેશો સાથેના સંબંધો ફરી ચર્ચામાં આવ્યા છે. હાલની પરિસ્થિતિમાં પાકિસ્તાનની અંદરથી ઉઠતા આરોપો અને ભારતની ચેતવણીઓ પર વિશ્વનું ધ્યાન ટકેલું છે.
