વડોદરાના ટાટા-એરબસ પ્લાન્ટમાં દેશનું પ્રથમ સ્વદેશી લશ્કરી વિમાન તૈયાર

ભારતના સંરક્ષણ ક્ષેત્રે એક નવો ઇતિહાસ રચાવા જઈ રહ્યો છે. વડોદરા સ્થિત ટાટા એડવાન્સ્ડ સિસ્ટમ્સ અને એરબસના સંયુક્ત પ્લાન્ટમાં પ્રથમ  સી-૨૯૫ લશ્કરી પરિવહન વિમાન તૈયાર થઈ ગયું છે.

ભારતીય વાયુસેનાને આ સપ્ટેમ્બરમાં તેનું પહેલું ‘મેડ ઇન ઇન્ડિયા’ સી-૨૯૫ એરક્રાફ્ટ મળવાની તૈયારી છે. આ એરક્રાફ્ટનું ઉત્પાદન ગુજરાતના વડોદરામાં સ્થિત ટાટા-એરબસ સુવિધામાં કરવામાં આવ્યું છે. સોશિયલ મીડિયા પર વાયરલ થયેલ એક વીડિયો આ એરક્રાફ્ટની પહેલી ઝલક આપે છે.

ભારતના ઇતિહાસમાં પહેલી વાર કોઈ ખાનગી કંપની સંપૂર્ણ લશ્કરી વિમાનનું ઉત્પાદન કરી રહી છે. ૨૮ ઓક્ટોબર, ૨૦૨૪ ના રોજ વડા પ્રધાન નરેન્દ્ર મોદી અને સ્પેનિશ વડા પ્રધાન પેડ્રો સાંચેઝે વડોદરામાં ટાટા-એરબસ પ્લાન્ટ નું ઉદ્ઘાટન કર્યું હતું.

ભારતે સ્પેન સાથે કરી છે ૫૬ એરક્રાફની ડિલ

ભારતે ૫૬ સી-૨૯૫ એરક્રાફ્ટ માટે સ્પેન સાથે કરાર કર્યો છે. આ કરાર હેઠળ ૧૬ એરક્રાફ્ટ સ્પેનથી આયાત કરવામાં આવશે, જ્યારે ૪૦ નું ઉત્પાદન વડોદરા સુવિધામાં કરવામાં આવશે. ટાટા ભારતમાં આ એરક્રાફ્ટના ઉત્પાદનની જવાબદારી ધરાવે છે. આ માટે વડોદરાના હરણી ખાતે ફાઇનલ એસેમ્બલી લાઇન સ્થાપિત કરવામાં આવી છે. આ સુવિધા વિમાનના ઉત્પાદન, એસેમ્બલી, પરીક્ષણ અને જાળવણી, સમારકામ અને ઓવરહોલ (MRO)નું સંચાલન કરશે. 

આ સુવિધા પર હવે પ્રથમ સી-૨૯૫ વિમાન પૂર્ણ થઈ ગયું છે. આ ‘મેડ ઇન ઇન્ડિયા’ પહેલમાં એક મહત્વપૂર્ણ છલાંગ છે. સુવિધાનું ઉદ્ઘાટન કરતી વખતે પીએમ નરેન્દ્ર મોદીએ જણાવ્યું હતું કે તે ભારતની સંરક્ષણ ઉત્પાદન ક્ષમતાઓને વધારશે અને ‘મેક ઇન ઇન્ડિયા, મેક ફોર ધ વર્લ્ડ’ ના મંત્રને સાકાર કરશે.

ગુજરાત બીજેપીએ વીડિયો શેર કર્યો

ગુજરાત ભાજપે પ્રથમ ‘મેડ ઇન ઇન્ડિયા’ સી-૨૯૫ વિમાનનો વીડિયો પણ શેર કર્યો છે. વડોદરા સુવિધા ભારતને સંરક્ષણ ક્ષેત્રમાં આત્મનિર્ભર બનાવવામાં મહત્વપૂર્ણ ભૂમિકા ભજવશે, અને ભવિષ્યમાં, અહીં ઉત્પાદિત વિમાન અન્ય દેશોમાં પણ નિકાસ કરી શકાય છે. મીડિયા રિપોર્ટ્સ અનુસાર, આ વિમાનનું પરીક્ષણ સપ્ટેમ્બર સુધીમાં પૂર્ણ થવાની અપેક્ષા છે. આ પછી વડા પ્રધાન નરેન્દ્ર મોદી ઔપચારિક રીતે વિમાનનું લોન્ચિંગ કરી શકે છે. 

આ વિમાનની સૌથી નોંધપાત્ર વિશેષતા એ છે કે તે ૬૭૦ મીટર જેટલા ટૂંકા રનવે પરથી ઉડાન ભરવાની ક્ષમતા ધરાવે છે, જે તેને લદ્દાખ જેવા પર્વતીય પ્રદેશોમાં કામગીરી માટે ખૂબ અસરકારક બનાવે છે. આ ક્ષમતા ભારતીય વાયુસેનાની તાકાતમાં નોંધપાત્ર વધારો કરશે.