કેન્દ્રીય મોટર વાહન નિયમોમાં મહત્વપૂર્ણ સુધારા કરવામાં આવ્યા છે, જેના કારણે ટ્રાફિક નિયમોના ભંગ સામે હવે વધુ કડક કાર્યવાહી કરવામાં આવશે. નવા નિયમો મુજબ એક જ વર્ષ દરમિયાન પાંચ કે તેથી વધુ વખત ટ્રાફિક ચલણ ફાટનાર વાહન ચાલકોનું ડ્રાઇવિંગ લાઇસન્સ સસ્પેન્ડ કરવામાં આવશે. ગંભીર નિયમભંગના કિસ્સાઓમાં લાઇસન્સ તાત્કાલિક ધોરણે રદ કરવાની જોગવાઈ પણ કરવામાં આવી છે.
નવા નિયમો અનુસાર ઈ-ચલણ સામે કોઈ વાંધો કે ફરિયાદ નોંધાવવી હોય તો વાહનચાલકોને ૪૫ દિવસનો સમય આપવામાં આવશે. જો આ સમયગાળા દરમિયાન કોઈ વાંધો રજૂ નહીં કરવામાં આવે તો સંબંધિત ચલણ આપોઆપ સ્વીકૃત ગણાશે.
આ ઉપરાંત, સમયસર ઈ-ચલણની રકમ નહીં ભરવામાં આવે તો સંબંધિત વાહનને ‘વાહન પોર્ટલ’ પર બ્લોક કરવાની કાર્યવાહી હાથ ધરવામાં આવશે. રાજ્ય સરકારે તમામ નાગરિકોને ટ્રાફિક નિયમોનું ચુસ્તપણે પાલન કરવા તેમજ બાકી રહેલા ઈ-ચલણ સમયસર ભરી દેવા અનુરોધ કર્યો છે. સરકારનું માનવું છે કે આ નવા નિયમોથી માર્ગ સલામતીમાં વધારો થશે અને ટ્રાફિક નિયમોના ઉલ્લંઘન પર અસરકારક નિયંત્રણ લાવી શકાશે.
