દિલ્હી વિધાનસભામાં ૨૨ હજાર કરોડના કૌભાંડ મુદ્દે ધમાસાણ

૮ ધારાસભ્યોને બળજબરીથી ગૃહમાંથી બહાર કરાયા

દિલ્હી વિધાનસભામાં કથિત રાશન કૌભાંડના મુદ્દે સત્તાધારી ભાજપ અને મુખ્ય વિપક્ષ આમ આદમી પાર્ટી વચ્ચે ભારે ઘર્ષણ જોવા મળ્યું છે. આપના ધારાસભ્યો સબ્સિડીવાળા ચોખાની ખરીદી અને વિતરણમાં ગડબડ અંગે તાત્કાલિક ચર્ચા કરવાની માગ સાથે હોબાળો કરી રહ્યા હતા. વિવાદ એટલો વધી ગયો કે વિધાનસભા અધ્યક્ષના આદેશ બાદ આપના 8 ધારાસભ્યોને માર્શલ દ્વારા ગૃહમાંથી બહાર કરી દેવામાં આવ્યા હતા.

ચોખાના મુદ્દે વિધાનસભામાં ભારે ધમાસાણ

વિધાનસભાની કાર્યવાહી દરમિયાન આપ ધારાસભ્યોએ કથિત રાશન કૌભાંડનો મુદ્દો ઉઠાવી સરકાર પાસે જવાબ માગ્યો હતો. વિપક્ષનો હંગામો વધતાં વિધાનસભા અધ્યક્ષે તેમના વર્તનને અયોગ્ય ગણાવ્યું હતું અને સ્પષ્ટ કર્યું હતું કે ગૃહમાં આવું આચરણ ચલાવી લેવાશે નહીં, જેના પછી 8 ધારાસભ્યોને માર્શલ આઉટ કરાયા હતા. બીજી તરફ, મંત્રી મનજિંદર સિંહ સિરસા એ આ આરોપોને ફગાવતા આપ ધારાસભ્ય કુલદીપ કુમાર પર ગૃહમાં ચોખા ફેંકીને ગૃહનું અપમાન કરવાનો આક્ષેપ કર્યો હતો.

આમ આદમી પાર્ટીની દિલ્હી ઈએકમો ના પ્રમુખ સૌરભ ભારદ્વાજે દાવો કર્યો કે અસમની એક કંપની અને દિલ્હી સરકાર દ્વારા ભારતીય ખાદ્ય નિગમ (એફસીઆઈ) પાસેથી દર અઠવાડિયે આશરે ૩૧ હજાર મીટ્રિક ટન સબ્સિડીવાળા ચોખાની માગ કરવામાં આવી હતી. તેમનો આરોપ છે કે ગરીબો માટેના આ ચોખા હરિયાણાની એક ખાનગી કંપનીને નફા પર વેચવાની યોજના હતી. આપનો દાવો છે કે આનાથી દર અઠવાડિયે ૧૪૩ કરોડ અને ૩ વર્ષમાં આશરે ૨૨ હજાર કરોડ રૂપિયાનું કૌભાંડ થઈ શક્યું હોત.

વિપક્ષનો સરકાર પર સીધો પ્રહાર

સૌરભ ભારદ્વાજે આરોપ લગાવ્યો કે સરકાર વિપક્ષને ગૃહમાં આ મહત્વના મુદ્દા પર ચર્ચા પણ કરવા દેતી નથી. તેમણે સવાલ ઉઠાવ્યો કે ગરીબોના નામે આટલી મોટી માત્રામાં ચોખાની માગ શા માટે કરવામાં આવી હતી? તેમણે મંત્રી પ્રવેશ વર્માના કથિત નિર્દેશ સામે પણ વાંધો ઉઠાવ્યો અને તેને વિધાનસભાના વિશિષ્ટ અધિકારોનું ઉલ્લંઘન ગણાવ્યું હતું.

આપનો દિલ્હી વિધાનસભા બહાર વિરોધ અને રાજીનામાની માગ

આ મુદ્દે દિલ્હી વિધાનસભાની બહાર પણ આમ આદમી પાર્ટીના ધારાસભ્યોએ ખાદ્ય અને નાગરિક પુરવઠા મંત્રી મનજિંદર સિંહ સિરસાના રાજીનામાની માગ સાથે ભારે વિરોધ પ્રદર્શન કર્યું હતું. આપનો આક્ષેપ છે કે દિલ્હીના ગરીબ અને સ્થળાંતરિત લોકો માટે સબ્સિડી પર મળતો ચોખાનો જથ્થો હરિયાણાની એક ખાનગી કંપનીને બ્લેક માર્કેટમાં વેચી દેવામાં આવ્યો છે. આપ ધારાસભ્ય સંજીવ ઝા એ ગંભીર આરોપ લગાવતા જણાવ્યું હતું કે, ‘આ ચોખા એફસીઆઈ ના હતા અને ભાજપે તેને ઓપન માર્કેટમાં વેચી દીધા. દર અઠવાડિયે ૧,૩૧,૦૦૦ મીટ્રિક ટન ચોખા ઓપન માર્કેટમાં વેચીને અઠવાડિયે આશરે ૫૦૦ કરોડ અને કુલ ૨૨,૦૦૦ કરોડ રૂપિયાનું કૌભાંડ આચરવાનો પ્રયાસ કરાયો હતો. આ મુદ્દા પર વિધાનસભામાં નિયમ ૫૫ હેઠળ ચર્ચા કરાવવા અમે માંગ કરી છે.’