એવા ૫ શિવલિંગ જેનો જળાભિષેક કરે છે અરબી સમુદ્ર

દીવથી ત્રણ કિમી દૂર પ્રકૃતિ અને આસ્થાનો અદ્ભુત સંગમ

શ્રાવણ મહિનો ચાલી રહ્યો છે અને આ પવિત્ર મહિનામાં શિવલિંગ પર જળાભિષેક કરવો ખૂબ જ શુભ માનવામાં આવે છે. પરંતુ શું તમે જાણો છો કે ગુજરાતની પડખે એક એવી જગ્યા પણ છે જ્યાં પાંચ એવા શિવલિંગ છે, જેમનો અભિષેક ખુદ સમુદ્ર દેવ કરે છે. ગંગેશ્વર મહાદેવ મંદિર કેન્દ્રશાસિત પ્રદેશ દીવના ફુદમ ગામ પાસે અરબી સમુદ્રના કિનારે આવેલું છે. દીવ શહેરથી આ મંદિર લગભગ ત્રણ કિલોમીટરના અંતરે છે. સમુદ્ર કિનારાના ખડકો વચ્ચે આવેલું આ મંદિર કદમાં ભલે ભવ્ય ન હોય, પરંતુ તેની અનોખી વિશેષતાને કારણે ખૂબ જ ખાસ છે.

અહીં ભગવાન શિવના પાંચ શિવલિંગ એકસાથે બિરાજમાન છે અને આ જ આ સ્થાનની સૌથી મોટી ઓળખ છે. સ્થાનિક માન્યતા અને ધાર્મિક પરંપરા અનુસાર, મહાભારત કાળમાં અજ્ઞાતવાસ દરમિયાન પાંચ પાંડવો આ વિસ્તારમાં આવ્યા હતા. પાંડવોએ અહીં ભગવાન શિવની આરાધના કરી અને પાંચ શિવલિંગની સ્થાપના કરી. કહેવાય છે કે પાંચેય શિવલિંગનો આકાર અલગ-અલગ છે. માન્યતા અનુસાર પહેલું શિવલિંગ યુધિષ્ઠિર, બીજું ભીમ, ત્રીજું અર્જુન, ચોથું સહદેવ અને પાંચમું નકુળ સાથે જોડાયેલું છે. પાંડવોએ પોતાની ઊંચાઈ (કદ) મુજબ આ શિવલિંગ બનાવ્યા હતા.

ગંગેશ્વર મહાદેવ મંદિર સમુદ્રની ખૂબ જ નજીક આવેલું છે. જ્યારે સમુદ્રમાં ભરતી આવે છે ત્યારે અરબી સમુદ્રના મોજાં ખડકો વચ્ચેથી આગળ વધે છે અને શિવલિંગ સુધી પહોંચી જાય છે. સમુદ્રનું પાણી શિવલિંગને સ્પર્શ કરે છે અને આ રીતે ભગવાન શિવનો કુદરતી જળાભિષેક થાય છે. મોજાં આવે છે, શિવલિંગને સ્પર્શ કરે છે અને ફરી સમુદ્રમાં સમાઈ જાય છે. આ દ્રશ્ય ભક્તો માટે અત્યંત આધ્યાત્મિક અને અદ્ભુત અનુભવ હોય છે.

જ્યારે સમુદ્રમાં ઓટ આવે છે ત્યારે પાણીનું સ્તર નીચે ઉતરી જાય છે અને ખડકો વચ્ચે આવેલા પાંચેય શિવલિંગ વધુ સ્પષ્ટ રીતે દેખાય છે. આ જ કારણે અહીં આવતા શ્રદ્ધાળુઓ માટે ભરતી અને ઓટના સમયનું ધ્યાન રાખવું ખૂબ જ જરૂરી છે. એક તરફ વિશાળ અરબી સમુદ્ર, બીજી તરફ કુદરતી ખડકો અને આ બધાની વચ્ચે ભગવાન શિવના પવિત્ર શિવલિંગ. સમુદ્રના મોજાંનો અવાજ અને હર-હર મહાદેવના નાદથી અહીંનું વાતાવરણ ભક્તિમય બની જાય છે.