વૈશ્વિક સંકટો વચ્ચે ભારતની અર્થવ્યવસ્થા થઈ મજબૂત!

જીડીપી નો દર ૭.૮ % નોંધાતા ઓઈએમ મોદીએ કહ્યું-‘નિરાશાવાદીઓ નિષ્ફળ રહ્યા’

અમેરિકા-ઈરાનનું યુદ્ધ પણ ભારતીય અર્થતંત્રની ઝડપને રોકી શક્યું નથી અને તેનું ઉદાહરણ છે નાણાકીય વર્ષ ૨૦૨૬-૨૭ ના પ્રથમ ત્રિમાસિક ગાળામાં જીડીપી ગ્રોથ રેટના આંકડા. આજે સોમવારે જાહેર કરવામાં આવેલા ભારત જીડીપી વૃદ્ધિ ડેટા પર નજર કરીએ, તો ઈકોનોમીમાં ૭.૮ % ની ઝડપથી આગળ વધી છે. આંકડાશાસ્ત્ર અને કાર્યક્રમ અમલીકરણ મંત્રાલય (એમઓએસપીઆઈ)ના જણાવ્યા મુજબ, એફવાય૨૦૨૬-૨૭ ના પ્રથમ ત્રિમાસિક ગાળામાં ભારતની રિયલ જીડીપી ગ્રોથ ૭.૮ % નોંધાયો છે. તો બીજી તરફ, નાણાકીય વર્ષ ૨૦૨૬-૨૭ ના પ્રથમ ત્રિમાસિક ગાળામાં નોમિનલ જીડીપી માં ૧૦.૩ % રહ્યું છે.

ભારતીય અર્થતંત્રે નાણાકીય વર્ષ ૨૦૨૬-૨૭ ના પ્રથમ ત્રિમાસિક ગાળામાં ૭.૮ % ની વૃદ્ધિ નોંધાવતા તમામ અંદાજોને પાછળ છોડી દીધા છે, ઝડપ અપેક્ષા કરતાં વધુ સારી રહી છે. ઉલ્લેખનીય છે કે એપ્રિલ-જૂનના ગ્રોથ રેટને લઈને તમામ અર્થશાસ્ત્રીઓ દ્વારા ૭.૧-૭.૨ % રહેવાનો અંદાજ વ્યક્ત કરવામાં આવી રહ્યો હતો, જેને ભારતીય ઈકોનોમીએ પાછળ છોડી દીધો છે. આ પહેલાના વર્ષના સમાન ત્રિમાસિક ગાળામાં ભારતીય અર્થતંત્ર ૬.૯ % ની ઝડપથી દોડ્યું હતું.

જૂન ત્રિમાસિક ગાળાનું જોરદાર પ્રદર્શન નાણાકીય વર્ષ ૨૦૨૬ ના જાન્યુઆરી-માર્ચ ત્રિમાસિક ગાળામાં થયેલી ૭.૮ % ગ્રોથ પછી આવ્યું છે. સરકારના કામચલાઉ અંદાજો અનુસાર, સમગ્ર નાણાકીય વર્ષ ૨૦૨૫-૨૬ માટે ભારતની વાસ્તવિક જીડીપી માં ૭.૭ % ની ગ્રોથ નોંધાઈ હતી.

જીડીપી ગ્રોથ રેટના આંકડા સામે આવ્યા બાદ વડા પ્રધાન મોદીએ વિરોધીઓ પર કટાક્ષ કરતાં કહ્યું કે-‘નાણાકીય વર્ષ ૨૦૨૬-૨૭ ના પ્રથમ ત્રિમાસિક ગાળા દરમિયાન ભારતનો ૭.૮ % નો અસાધારણ જીડીપી ગ્રોથએ એક ભગીરથ સિદ્ધિ છે. વૈશ્વિક અનિશ્ચિતતાઓ વચ્ચે તેલના ભાવમાં થયેલો વધારો અને સપ્લાય ચેનની સમસ્યાઓ છતાં, આપણા લોકોની સામૂહિક શક્તિએ સુનિશ્ચિત કર્યું કે ભારત આટલો વિકાસ હાંસલ કરી શકે. નિરાશાવાદીઓ નિષ્ફળ રહ્યા અને ભારત ફરી એકવાર ખીલી ઉઠ્યું!’

ખાસ વાત એ છે કે ભારત જીડીપી વૃદ્ધિ નો આ આંકડો એવા પડકારજનક વૈશ્વિક વાતાવરણમાં આવ્યો છે, જ્યારે સપ્લાય ચેઇનથી લઈને ઓઇલ-ગેસ સંકટ ચરમસીમા પર હતું. જેનો મતલબ સ્પષ્ટ છે કે ટૅરિફનો ભય હોય કે, અન્ય ભૌગોલિક-રાજકીય તણાવ, ઊર્જાની વધતી કિંમતો હોય કે વૈશ્વિક વેપારને લઈને અનિશ્ચિતતા, દરેક વાતાવરણમાં દેશની જીડીપી ની ઝડપ સારી રહી છે. આ દબાણો છતાં સ્થાનિક માગ આર્થિક પ્રવૃત્તિઓ માટે એક મુખ્ય સપોર્ટ બની રહી. બીજી તરફ સરકારી મૂડી ખર્ચ, મેન્યુફેક્ચરિંગ, કન્સ્ટ્રક્શન અને નિકાસે પણ વિકાસમાં યોગદાન આપ્યું.