સાહિલ-સમીરાની ધરપકડ
દિલ્હી પોલીસના સ્પેશિયલ સેલે પાકિસ્તાનની ગુપ્તચર એજન્સી ISI સાથે જોડાયેલા કથિત જાસૂસી નેટવર્કનો પર્દાફાશ કર્યો હોવાનો દાવો કર્યો છે. આ મામલે દિલ્હીના એક યુવાન દંપતી મોહમ્મદ સાહિલ અને તેની પત્ની સમીરાની ધરપકડ કરવામાં આવી છે. પોલીસના જણાવ્યા મુજબ, બંને આરોપીઓ વર્ષ ૨૦૨૪થી પાકિસ્તાની હેન્ડલર્સના સંપર્કમાં હતા અને સોશિયલ મીડિયા મારફતે કથિત રીતે આ નેટવર્ક સાથે જોડાયા હતા.
પોલીસને દિલ્હી-NCR વિસ્તારમાં પાકિસ્તાન સમર્થિત જાસૂસી નેટવર્ક સક્રિય હોવાની માહિતી મળી હતી. ત્યારબાદ સ્પેશિયલ સેલની ટીમે તપાસ શરૂ કરી હતી. તપાસ દરમિયાન ભારતીય સિમ કાર્ડ મેળવવા અને તેને પાકિસ્તાન મોકલવાના પ્રયાસો અંગે મહત્વપૂર્ણ માહિતી સામે આવી હતી. પોલીસના દાવા પ્રમાણે, સાહિલ વર્ષ ૨૦૨૪ માં Instagram મારફતે એક પાકિસ્તાની એજન્ટના સંપર્કમાં આવ્યો હતો. આ સંપર્ક તેની મિત્ર સમીરા મારફતે થયો હોવાનું તપાસમાં સામે આવ્યું છે. ત્યારબાદ બંનેના લગ્ન થયા હતા અને એક કથિત પાકિસ્તાની ગુપ્તચર અધિકારી એટલે કે PIO સાથે તેમનો સંપર્ક કરાવવામાં આવ્યો હતો.
તપાસમાં પોલીસને જાણવા મળ્યું હોવાનું કહેવાય છે કે ૨૦૨૪ થી ૨૦૨૫ દરમિયાન દંપતીએ દુબઈ મારફતે આશરે આઠ ભારતીય સિમ કાર્ડ પાકિસ્તાન મોકલ્યા હતા. તેના બદલામાં તેમને આશરે રૂ. ૩૦ હજાર મળ્યા હોવાનો પોલીસનો દાવો છે. આ સિમ કાર્ડનો ઉપયોગ પાકિસ્તાનમાં WhatsApp એકાઉન્ટ ચલાવવા તેમજ ભારતીય WhatsApp ગ્રુપમાં પ્રવેશ મેળવી સંવેદનશીલ માહિતી મેળવવા માટે કરવામાં આવ્યો હોવાની શંકા વ્યક્ત કરવામાં આવી છે. આ કેસમાં બંને આરોપીઓના મોબાઇલ ફોન પોલીસ દ્વારા જપ્ત કરવામાં આવ્યા છે. ફોરેન્સિક તપાસ દરમિયાન પાકિસ્તાની હેન્ડલર્સ સાથેની કથિત શંકાસ્પદ ચેટ અને વાતચીતના પુરાવા મળ્યા હોવાનો પોલીસનો દાવો છે. સાહિલની પૂછપરછ બાદ મળેલી માહિતીના આધારે સમીરા સુધી પોલીસ પહોંચી હતી.
પોલીસનો આરોપ છે કે સમીરાએ ભારતીય સિમ કાર્ડ મેળવવામાં અને તેને પાકિસ્તાન સુધી પહોંચાડવામાં મહત્વની ભૂમિકા ભજવી હતી. તેના મોબાઇલ ફોનમાંથી પણ સાહિલ, સમીરા અને પાકિસ્તાન સ્થિત હેન્ડલર્સ વચ્ચેની કથિત WhatsApp ચેટ અને વાતચીત મળી આવી હોવાનું જણાવાયું છે. હાલ સ્પેશિયલ સેલ સમગ્ર નેટવર્કની તપાસ કરી રહ્યું છે. પાકિસ્તાની હેન્ડલર્સ, સિમ કાર્ડની હેરફેર અને આ નેટવર્કમાં સંડોવાયેલા અન્ય લોકોની ભૂમિકા અંગે તપાસ ચાલી રહી છે. પોલીસના આરોપોની કાયદેસર પુષ્ટિ તપાસ અને ન્યાયિક પ્રક્રિયા બાદ જ થશે.
કલ્પેશ એન લીંબાસિયા
વિશ્વ સમાચાર રિપોર્ટર
