એશિયન ગેમ્સ ૨૦૨૬

ગૌતમ ગંભીર નહીં પણ આ દિગ્ગજ બનશે હેડ કોચ, શ્રેયસ અય્યર કેપ્ટન

જાપાનમાં યોજાનારી એશિયન ગેમ્સ ૨૦૨૬ માટે ભારતીય ક્રિકેટ ટીમે તૈયારીઓ તેજ કરી દીધી છે. ૨૪ સપ્ટેમ્બરથી શરૂ થઈ રહેલી મેન્સ ક્રિકેટ ટુર્નામેન્ટમાં ભારતીય ટીમનું નેતૃત્વ શ્રેયસ અય્યર કરશે. જોકે, ટીમના નિયમિત હેડ કોચ ગૌતમ ગંભીર ટીમ સાથે જાપાન જશે નહીં. એશિયન ગેમ્સ અને વેસ્ટ ઈન્ડિઝ સામેની ભારતની મલ્ટી-ફોર્મેટ સીરિઝની તારીખો એકબીજા સાથે ટકરાઈ રહી છે, જેના કારણે ભારતીય ક્રિકેટ ટીમે એકસાથે બે અલગ મોરચે મેદાનમાં ઉતરવું પડશે. મુખ્ય ટીમ વેસ્ટ ઈન્ડિઝ સામે રમશે, જ્યારે શ્રેયસ અય્યરની આગેવાની હેઠળની બીજી ટીમ એશિયન ગેમ્સમાં દેશનું પ્રતિનિધિત્વ કરશે.

ગૌતમ ગંભીર ની ગેરહાજરીમાં પૂર્વ બેટ્સમેન વીવીએસ લક્ષ્મણ હેડ કોચની જવાબદારી સંભાળશે. પીટીઆઈના અહેવાલ મુજબ, લક્ષ્મણની સાથે સુનીલ જોશી, ઋષિકેશ કાનિટકર અને શુભદીપ ઘોષ સપોર્ટ સ્ટાફનો ભાગ બનશે. આ ઉપરાંત મારુફ ફજંદર સપોર્ટ સ્ટાફ લીડરની ભૂમિકા નિભાવશે. ભારતીય ટીમમાં ઘણા સ્ટાર ટી-૨૦ ખેલાડીઓ સામેલ હોવાથી ભારતને ગોલ્ડ મેડલનું પ્રબળ દાવેદાર માનવામાં આવી રહ્યું છે.

એશિયન ગેમ્સમાં એથ્લેટિક્સ બાદ ક્રિકેટ ટીમનો સપોર્ટ સ્ટાફ સૌથી મોટો હશે. સારી રેન્કિંગના કારણે ભારતીય ટીમે ગ્રુપ સ્ટેજના મુકાબલા રમવાની જરૂર નહીં પડે અને તેને સીધો જ ક્વાર્ટર ફાઇનલમાં પ્રવેશ મળ્યો છે.

શ્રેયસ અય્યર બ્રિગેડ ટુર્નામેન્ટની બીજી ક્વાર્ટર ફાઇનલ રમશે, જે એશિયન ગેમ્સ ૨૦૨૬ માં ભારતનો પ્રથમ મેચ હશે. બીજી તરફ પાકિસ્તાનની ટીમ પ્રથમ ક્વાર્ટર ફાઇનલમાં ઉતરશે. ભારત અને પાકિસ્તાન ઉપરાંત શ્રીલંકા અને બાંગ્લાદેશ પણ સીધા જ ક્વાર્ટર ફાઇનલમાં પહોંચ્યા છે. જોકે, આ ટીમો સામે કઈ ટીમ ટકરાશે તેનો નિર્ણય ગ્રુપ મેચો બાદ લેવાશે.