ખાદ્યતેલ પર ઈમ્પોર્ટ ડ્યુટી ઘટી

કયું તેલ સસ્તું થશે

તહેવારોની મોસમ નજીક આવી રહી છે ત્યારે સામાન્ય નાગરિકો અને ગૃહિણીઓ માટે રાહતના સમાચાર સામે આવ્યા છે. કેન્દ્ર સરકાર દ્વારા પામ ઓઈલ, સોયા ઓઈલ અને સનફ્લાવર ઓઈલ સહિતના મુખ્ય ખાદ્ય તેલો પરની આયાત ડ્યુટીમાં મોટો ઘટાડો કરવામાં આવ્યો છે.

છેલ્લા ૧ વર્ષમાં ભારતમાં વનસ્પતિ તેલના ભાવોમાં લગભગ ૨૦ % સુધીનો વધારો નોંધાયો હતો, જેને ધ્યાનમાં રાખીને આ નિર્ણય લેવાયો છે. સપ્ટેમ્બરથી નવેમ્બર દરમિયાન આવનારા મુખ્ય ધાર્મિક તહેવારો અને ઉત્સવોમાં મીઠાઈ, ફરાળ અને તળેલી વસ્તુઓની માંગ વધતી હોય છે, ત્યારે આ ડ્યુટી કટથી બજારમાં તેલના ભાવ નીચા આવશે અને ગ્રાહકોને મોટી રાહત મળશે.

સરકાર દ્વારા જાહેર કરવામાં આવેલા નોટિફિકેશન મુજબ ક્રૂડ પામ ઓઈલ અને સોયા ઓઈલ પરની બેઝિક આયાત ડ્યુટી ૧૦ % થી ઘટાડીને ૫ % કરી દેવામાં આવી છે. આ ઉપરાંત રિફાઈન્ડ પામ ઓઈલ અને રિફાઈન્ડ સોયા ઓઈલ પરની ડ્યુટી ૩૨.૫ % થી ઘટાડીને ૨૭.૫ % કરવામાં આવી છે. ક્રૂડ સનફ્લાવર ઓઈલ પરની આયાત ડ્યુટી ૧૦ % થી ઘટાડીને શૂન્ય કરી દેવામાં આવી છે. જ્યારે રિફાઈન્ડ સનફ્લાવર ઓઈલ પરની ડ્યુટી ૩૨.૫ % થી ઘટાડીને ૨૨.૫ % કરવામાં આવી છે. બેઝિક કસ્ટમ ડ્યુટી ઉપરાંત ખાદ્ય તેલની આયાત પર એગ્રીકલ્ચર ઇન્ફ્રાસ્ટ્રક્ચર એન્ડ ડેવલપમેન્ટ સેસ અને સોશિયલ વેલફેર સરચાર્જ પણ લાગુ પડે છે. જેના કારણે હવે ક્રૂડ પામ અને સોયા ઓઈલ પર કુલ આયાત ડ્યુટી ૧૬.૫ % થી ઘટીને ૧૧ % થઈ ગઈ છે, જ્યારે ક્રૂડ સનફ્લાવર ઓઈલ પર ડ્યુટી ૧૬.૫ % થી ઘટીને ૫.૫ % થઈ ગઈ છે.