રાજકોટની મેંગો માર્કેટમાં અચાનક આગ લાગતાં અફરાતફરી મચી ગઇ હતી. આગને કારણે વેપારીઓમાં નાસભાગ મચી ગઈ હતી. ઘટનાની જાણ થતાં ફાયર ફાઇટર દોડી ગયું હતું, જોકે આગ પર કાબૂ મેળવે એ પહેલાં લાખનો માલ બળીને ખાખ થઇ ગયો હતો. આગ લાગવા પાછળનું કારણ અકબંધ છે. આગ લાગતાં મોટી સંખ્યામાં લોકો એકત્ર થઇ ગયા હતા. આગ માર્કેટમાં વધુ પ્રસરે એ પહેલાં કાબૂમાં આવી જતાં વેપારીઓએ રાહતનો શ્વાસ લીધો હતો.
રાજકોટના મોટા ભાગના લોકો ખરીદી કરવા આવે છે
રાજકોટની મેંગો માર્કેટમાં મોટી સંખ્યામાં શહેરીજનો ફળ ખરીદવા આવે છે. ત્યારે આજે સવારે કોઇ કારણોસર આગ લાગતાં વિકરાળ સ્વરૂપ ધારણ કર્યું હતું. જોકે સદનસીબે આગ પર ફાયરબ્રિગેડે કાબૂ મેળવી લીધો હતો. આગ કાબૂમાં આવતાં મોટી દુર્ઘટના ટળી હતી. કેટલાક વેપારીઓનો સામાન બળીને ખાખ થયો હતો. ફાયરબ્રિગેડના જવાનોએ સતત પાણીનો મારો ચલાવતાં આગ કાબૂમાં આવી હતી.
2 મહિના પહેલાં ગોંડલમાં તિરુપતિ ઇન્ડસ્ટ્રીઝમાં મગફળીના ગોડાઉનમાં આગ લાગી હતી
ગોંડલમાં બે મહિના પહેલાં આગનો બનાવ સામે આવ્યો હતો. વહેલી સવારે કોટન રોલના કારખાનામાં આગ લાગી હતી અને ફાયરબ્રિગેડે ગણતરીની કલાકમાં આગ પર કાબૂ મેળવ્યો હતો. બાદમાં ઉમવાડા રોડ પર આવેલી તિરુપતિ ઇન્ડસ્ટ્રીઝમાં આવેલા મગફળીના ગોડાઉનમાં આગ લાગી હતી, આથી ગોંડલથી 2 અને રાજકોટથી એક ફાયર ફાઇટર દોડી ગયું છે. ફાયર વિભાગ દ્વારા આગ પર કાબૂ મેળવાયો હતો. તિરુપતિ ઇન્ડસ્ટ્રીઝમાં આવેલા મગફળીના ગોડાઉનમાં આગ લાગતાં મગફળીની ગૂણીઓમાં આગ પ્રસરી હતી. ગૂણીઓ ખસેડવા માટે જેસીબીની મદદ લેવાઇ હતી. કોથળામાં મગફળી ભરી હોવાથી આગ જોતજોતામાં આખા ગોડાઉનમાં પ્રસરી હતી.