આખા ગુજરાત માં સર્વત્ર વરસાદી માહોલ છવાયો છે. બંગાળના અખાતમાં સર્જાયેલા લો પ્રેશરને કારણે રાજ્યમાં મોટાભાગનાં વિસ્તારોમાં 27 જુલાઈ સુધી ભારેથી અતિભારે વરસાદની આગાહી કરવામાં આવી છે. હવામાન વિભાગે 25મી જુલાઇ, રવિવારે નવસારી, વલસાડ, ડાંગ, સંઘપ્રદેશમાં રેડ એલર્ટ જાહેર કર્યું છે. આ ઉપરાંત સૌરાષ્ટ્ર તથા ઉત્તરગુજરાતના કેટલાક વિસ્તારોમાં પણ માપસર થી ભારે વરસાદ પડી શકે છે. મહત્ત્વનું છે કે, રાજ્યમાં હજી પણ 8થી 10 ટકા જેટલી ઘટ છે અને કુલ સીઝનનો 30 ટકા જેટલો વરસાદ નોંધાયો છે.
ગુજરાત માં શનિવારે વરસાદની વાત કરીએ તો 166 તાલુકામાં વરસાદ નોંધાયો છે. સૌથી વધુ વરસાદ ગોંડલમાં ચાર કલાકમાં 5 ઇંચ અને રાજકોટમાં 4 ઇંચ જેટલો નોંધાયો હતો. ઉપરાંત અમદાવાદમાં મોડી સાંજે ઘણા વિસ્તારોમાં તોફાની વરસાદ થયો હતો. આજે પણ શહેરમાં હળવાથી ભારે વરસાદ થશે તેવી આગાહી કરવામાં આવી છે.