નવી દિલ્હી : ભારતીય દળોના સામર્થ્ય વધારવા માટે લશ્કરે સ્કાય સ્ટ્રાઇકર નામના 100 કરતાં વધારે સશસ્ત્ર ડ્રોન મેળવવા માટે બેન્ગાલુરૂમાં હેડ કવાર્ટર ધરાવતી કંપની આલ્ફા ડિઝાઇન સાથે કરાર કર્યા છે. આલ્ફા ડિઝાઇન ઇઝરાયલની એલ્બિત સિક્યુરિટી સિસ્ટમ્સ સાથેના સંયુક્ત સહકારમાં આ ડ્રોનનું બેન્ગાલુરૂમાં ઉત્પાદન કરશે.
આ ડ્રોન મેળવવાના કરાર થવાને પગલે ભારત સરકારની મેક ઇન ઇન્ડિયા ઝૂંબેશને પણ વેગ મળશે. આ ડ્રોનનું ઉત્પાદન બેન્ગાલુરૂમાં થવાનું હોઇ સંરક્ષણ ક્ષેત્રના સ્વદેશીકરણને પણ વેગ મળશે. ભારતીય લશ્કરે સ્કાયસ્ટ્રાઇકર ડ્રોન મેળવવાનો ઓર્ડર તેના ઇમરજન્સી પ્રોક્યુરમેન્ટ પાવર્સનો ઉપયોગ કરીને આપ્યો છે. આ ડ્રોન મેળવવા માટે પહેલી સપ્ટેમ્બરે કરાર કરવામાં આવ્યા હતા.
ઇઝરાયલી કંપનીની વેબસાઇટ પર આ ડ્રોન અંગે આપવામાં આવેલી માહિતી અનુસાર સ્કાયસ્ટ્રાઇકર ડ્રોન લાંબા અંતરે ચોકસાઇપૂર્ણ હુમલો કરવા માટે કિફાયતી ઉપકરણ છે. સ્કાયસ્ટ્રાકકર ડ્રોનના ઇલેકટ્રિક પ્રોપલ્શન નહિવત અવાજ કરતા હોવાથી નીચી ઉંચાઇએ ગુપ્ત કામગીરી કરવા માટે આ ડ્રોન આદર્શ પુરવાર થાય તેમ છે. આ ડ્રોન લક્ષ્યસ્થાને વિસ્ફોટકો સાથે ધસી જતા હોવાથી તેને સુસાઇડ ડ્રોન તરીકે પણ ઓળખવામાં આવે છે.
આલ્ફા ડિઝાઇનના ચેરમેન તથા મેનેજિંગ ડાયરેકટર નિવૃત્ત કર્નલ એચએસ શંકરે જણાવ્યું હતું કે આ ડ્રોનને લોન્ચ કરતાં પૂર્વે તેમાં જીપીએસ દ્વારા સ્થળની વિગતો ભરવામાં આવે છે. આ ડ્રોનને છોડયા બાદ તે જે તે વિસ્તારમાં હવામાં રહીને તેના લક્ષ્યને ઓળખી તેની માહિતી ગ્રાઉન્ડ કન્ટ્રોલને મોકલે છે. તેને મંજૂરી મળ્યા બાદ જ તે હુમલો કરે છે.