ICC મહિલા ક્રિકેટ વર્લ્ડ કપ રમવા માટે ઇન્દોર આવેલી ઓસ્ટ્રેલિયન ટીમની બે ખેલાડીઓ સાથે છેડતીનો મામલો પ્રકાશમાં આવ્યો છે. આ ઘટના બાદ પોલીસે આરોપીને શોધવા માટે પાંચ પોલીસ સ્ટેશનની એક ટીમ બનાવી અને તેને પકડી લીધો. હાલમાં આરોપીની પૂછપરછ ચાલી રહી છે. આ ઘટના ગુરુવારે સવારે 11 વાગ્યાની આસપાસ ખજરાના રોડ પર બની હોવાનું જાણવા મળે છે.
MIG પોલીસ સ્ટેશનમાં દાખલ કરાયેલી FIR મુજબ, મોટરસાઇકલ પર સવાર આરોપીએ બે ખેલાડીનો પીછો કર્યો, અશ્લીલ હરકતો કરી અને કથિત રીતે તેમાંથી એકને પકડવાનો પ્રયાસ કર્યો. ખેલાડીઓએ તરત જ સવારે 11:08 વાગ્યે ‘લાઈવ લોકેશન’ ડિસ્ટ્રેસ સિગ્નલથી તેમના ટીમ સિક્યોરિટી મેનેજર, ડેની સિમન્સને એલર્ટ મોકલ્યું, ત્યાર બાદ એક વ્હોટ્સએપ મેસેજ આવ્યો.
થોડીવારમાં જ સિમન્સે ટીમ લાયઝન ઑફિસર્સનો સંપર્ક કર્યો, જેમણે તાત્કાલિક સહાય માટે ઇન્દોર પોલીસ સાથે સંકલન કર્યું. પોલીસે રિયલ ટાઇમમાં લોકેશન ટ્રેસ કર્યું અને શંકાસ્પદ વ્યક્તિને અટકાવવા માટે ટીમ રવાના કરી. સાંજ સુધીમાં ખજરાના રહેવાસી 30 વર્ષીય અકીલ તરીકે ઓળખાતા આરોપીની ધરપકડ કરવામાં આવી.