ગુજરાતમાં માવઠું: ૪ કલાકમાં ૧૩૮ તાલુકામાં વરસાદ, મગફળી, ડાંગર, ચીકુના પાકને નુકસાન થતાં ખેડૂતોને નુકસાન -

અમરેલીના રાજુલામાં સૌથી વધુ 6 ઇંચ જેટલો ધોધમાર વરસાદ ખાબક્યો હતો.

રાજ્યમાં કમોસમી વરસાદનો કેર સતત જારી છે.

સ્ટેટ ઇમરજન્સી ઓપરેશન સેન્ટર, ગાંધીનગર દ્વારા જાહેર કરાયેલા આંકડા મુજબ, રવિવારે સવારે ૬ થી ૧૦ વાગ્યા સુધીના ૪ કલાકમાં કુલ ૧૩૮ તાલુકામાં વરસાદ નોંધાયો છે.

હવામાન વિભાગના આંકડા અનુસાર, સૌથી વધુ અમરેલીના રાજુલા તાલુકામાં ૬.૨૨ ઈંચ વરસાદ નોંધાયો હતો.

ભાવનગરના મહુવામાં ૩.૩૯ ઈંચ વરસાદ

ખેડાના ગળતેશ્વરમાં અને ભાવનગરના વલ્લભીપુરમાં ૩.૧૫ ઈંચ તેમજ અમરેલીના લિલિયામાં ૩.૦૭ ઈંચ વરસાદ નોંધાયો હતો.

આ કમોસમી વરસાદે ખેતરોમાં તૈયાર પાકને નુકસાન પહોંચાડ્યું હોવાના અહેવાલ છે, જેના કારણે ખેડૂતોમાં ચિંતાનું મોજું ફરી વળ્યું છે.

આ કમોસમી માવઠાને કારણે ખેડૂતોને બેવડી આફતનો સામનો કરવો પડ્યો છે, કારણ કે એક તરફ શિયાળુ પાકની તૈયારીઓ ચાલી રહી છે, તો બીજી તરફ કપાસ, મગફળી અને અન્ય પાકોની લણણી ચાલી રહી છે.

દરિયાઈ પટ્ટી પર સંભવિત ખતરો જારી છે. દેવભૂમિ દ્વારકા જિલ્લાના ઓખા બંદર પર સતત બીજા દિવસે નંબર 3નું ભયસૂચક સિગ્નલ યથાવત્ રાખવામાં આવ્યું છે. દરિયામાં ભારે કરંટ અને તોફાની પવનની સંભાવનાને પગલે ગુજરાત મેરીટાઇમ બોર્ડ (GMB) દ્વારા માલસામાનનું વહન કરતી નાની હોડીઓને પ્રસ્થાન ટાળવાની સૂચના આપવામાં આવી છે.

૨૭ ઑક્ટોબર : અમરેલી, ગીર સોમનાથ, કચ્છ, દીવમાં ઑરેન્જ ઍલર્ટ અને બનાસકાંઠા, પાટણ, મહેસાણા, સાબરકાંઠા, ગાંધીનગર, અરવલ્લી, ખેડા, અમદાવાદ, આણંદ, મહીસાગર, ભરુચ, સુરત, નવસારી, રાજકોટ, જામનગર, ભાવનગરમાં યલો ઍલર્ટ જાહેર કરવામાં આવ્યું છે.

૨૮ ઑક્ટોબર : ભરુચ, સુરત, નવસારી, વલસાડ, પોરબંદર, જૂનાગઢ, અમરેલી, ભાવનગર, દ્વારકા, ગીર સોમનાથ, દીવમાં યલો ઍલર્ટ આપવામાં આવ્યું છે.