વડોદરા પોલીસની પોલ ખુલી

બીજી તરફ એવી ચર્ચા પણ સામે આવી છે કે, અગાઉ લક્ષ્મીપુરા પોલીસની ટીમે બુટલેગર મુન્નાના સ્થળે દરોડો પાડ્યો હતો, પરંતુ પોલીસને ખાલી હાથે પરત ફરવું પડ્યું હતું. આથી નારાજ થયેલા મુન્નાએ સમતા પોલીસ ચોકીની હદમાં મોપેડ સાથે રોહિતને ઝડપી લઈ પોલીસને બોલાવી ડેકીમાં દારૂ હોવાના આક્ષેપ સાથે તપાસ કરવાનું જણાવ્યું હતું. છતાં પોલીસે ત્યાં પણ મોપેડની ડેકીની તપાસ કર્યા વગર ચાલકને છોડી દેતા, મુન્નાએ પોલીસ સામે દારૂના ધંધામાં વહાલા–દવલાની નીતિ અપનાવવાના આક્ષેપો કર્યા છે. ઘટના બાદ સમગ્ર મામલાએ નવો વળાંક લીધો હતો. 

પોલીસએ પોતાની આબરૂ બચાવવાના પ્રયાસરૂપે ગણતરીના કલાકોમાં મોપેડ ચાલકને દારૂના જથ્થા સાથે ઝડપી પાડી ગુનો નોંધ્યો હોવાનું ચર્ચાઈ રહ્યું છે. આ અંગે મળતી વિગતો મુજબ, લક્ષ્મીપુરા પોલીસ સ્ટેશનના હેડ કોન્સ્ટેબલ અલ્પેશ ઘનશ્યામભાઈએ ફરિયાદ નોંધાવી છે કે, પેટ્રોલિંગ દરમિયાન પ્રિયા સલૂન પાસે એક વ્યક્તિ મોપેડ સાથે ઊભો દેખાયો હતો. પોલીસને જોઈ તે નાસી છૂટતા શંકા જતા તેનો પીછો કરવામાં આવ્યો હતો.

પોલીસે સાંજે 6.50 વાગ્યે સપનાના વાવેતર હોલ પાસેથી મોપેડ ચાલકને ઝડપી પાડ્યો હતો. તપાસ દરમિયાન તેની ઓળખ રોહિત રાજુભાઈ કથેરીયા (રહે. ઋષિ નગર, ગોરવા પોલીસ સ્ટેશન સામે) તરીકે થઈ હતી. મોપેડની ડેકીની તપાસ કરતા દારૂના ચાર ક્વોટર મળી આવ્યા હતા. પોલીસે દારૂ અને મોપેડ સહિત કુલ રૂ. 20,500નો મુદ્દામાલ કબજે કરી આગળની કાર્યવાહી હાથ ધરી છે. ગાંધીના ગુજરાતમાં દારૂબંધી હોવા છતાં આવી ઘટનાઓ સામે આવતાં ખાખીની ભૂમિકા અને કામગીરી પર ફરી એક વખત ગંભીર સવાલો ઊભા થયા છે.