ગુજરાતમાં કયા જિલ્લાઓમાં પડશે વરસાદ?
રાજ્યમાં ફરી એકવાર માવઠાની સ્થિતિ સર્જાવાની સંભાવના વ્યક્ત કરવામાં આવી છે. હવામાન વિભાગની લેટેસ્ટ આગાહી અનુસાર આજે અને આવતીકાલે ગુજરાતના અનેક વિસ્તારોમાં હળવાથી મધ્યમ પવન સાથે છૂટાછવાયા વરસાદની શક્યતા છે. સાથે જ કેટલીક જગ્યાઓએ વીજળી પડવાની શક્યતા પણ વ્યક્ત કરવામાં આવી છે, જેના કારણે લોકોને સાવચેત રહેવા સૂચના આપવામાં આવી છે.
નુકસાન થવાની ભીતિ
ઉત્તર ગુજરાતના બનાસકાંઠા, પાટણ, સાબરકાંઠા અને મહેસાણા જિલ્લાઓમાં ખાસ કરીને માવઠાની અસર જોવા મળી શકે છે. આ વિસ્તારોમાં હળવો વરસાદ અને ગાજવીજ સાથેનું વાતાવરણ સર્જાવાની સંભાવના છે. ખેડુતો માટે આ પરિસ્થિતિ ચિંતાજનક બની શકે છે.
પવનની ગતિ વધવાની શક્યતા
સૌરાષ્ટ્ર વિસ્તારમાં પણ માવઠાની અસર રહેશે. સુરેન્દ્રનગર, રાજકોટ, જામનગર, પોરબંદર, મોરબી, દ્વારકા અને કચ્છ જિલ્લામાં છૂટાછવાયા વરસાદની આગાહી છે. આ સાથે પવનની ગતિ વધવાની શક્યતા હોવાથી દરિયાકાંઠાના વિસ્તારોમાં ખાસ સાવચેતી રાખવાની સલાહ આપવામાં આવી છે. આવતીકાલે ઉત્તર અને મધ્ય ગુજરાતના વિસ્તારોમાં પવનની ગતિ વધુ તેજ બની શકે છે અને વીજળી પડવાની શક્યતા પણ વધી શકે છે.
