દિગ્ગજ ખેડૂત નેતા સાગર રબારીએ આપ્યું રાજીનામું
ગુજરાતના રાજકારણમાંથી એક મોટા સમાચાર સામે આવી રહ્યા છે. આમ આદમી પાર્ટી ના પ્રદેશ ઉપાધ્યક્ષ અને જાણીતા ખેડૂત નેતા સાગર રબારીએ આમ આદમી પાર્ટીના તમામ હોદ્દા અને પ્રાથમિક સભ્યપદેથી રાજીનામું આપી દીધું છે. 2026ની મહાનગરપાલિકાની ચૂંટણીઓ અને રાજ્યના બદલાતા રાજકીય સમીકરણો વચ્ચે સાગર રબારીનું રાજીનામું ‘આપ’ માટે મોટો ફટકો માનવામાં આવી રહ્યો છે
રાજીનામા પાછળના સંભવિત કારણો
સાગર રબારી ગુજરાતના ખેડૂતોના પ્રશ્નોને વાચા આપવા માટે જાણીતા છે. સૂત્રોના જણાવ્યા અનુસાર પાર્ટીની આંતરિક કામગીરી અને ખેડૂતોના પ્રશ્નો પર પાર્ટીના વલણથી તેઓ છેલ્લા કેટલાક સમયથી નારાજ હોવાનું ચર્ચાઈ રહ્યું હતું. તેમણે પોતાનું રાજીનામું પક્ષના પ્રદેશ પ્રમુખને મોકલી આપ્યું છે. સાગર રબારીએ અગાઉ પણ અનેક વખત જમીન સંપાદન અને ખેડૂતોના હક માટે આંદોલનો કર્યા છે, ત્યારે તેમનું પક્ષ છોડવું એ ‘આપ’ ના ગ્રામીણ સંગઠન પર સીધી અસર કરી શકે છે.
સાગર રબારી ગુજરાતના ખેડૂત અધિકાર મંચના વડા રહી ચૂક્યા છે. તેઓ ૨૦૨૧ માં આમ આદમી પાર્ટીમાં જોડાયા હતા. પાર્ટીએ તેમને પ્રદેશ ઉપાધ્યક્ષ જેવી મહત્ત્વની જવાબદારી સોંપી હતી. ૨૦૨૨ ની વિધાનસભા ચૂંટણીમાં પણ તેમણે મહત્ત્વની ભૂમિકા ભજવી હતી. ખેડૂત સમાજમાં તેમનું મોટું વર્ચસ્વ હોવાને કારણે ‘આપ’ તેમને ખેડૂત ચહેરા તરીકે રજૂ કરતી હતી.
આમ આદમી પાર્ટી પર શું અસર થશે?
હાલમાં જ્યારે આમ આદમી પાર્ટી ગુજરાતમાં પોતાનો પગપેસારો મજબૂત કરવા મથી રહી છે, ત્યારે સાગર રબારી જેવા કદાવર નેતાનું જવું પક્ષ માટે નુકસાનકારક સાબિત થઈ શકે છે. ખાસ કરીને ઉત્તર ગુજરાત અને સૌરાષ્ટ્રના ખેડૂત મતદારો પર આની અસર જોવા મળી શકે છે. હવે જોવાનું એ રહેશે કે સાગર રબારી અપક્ષ તરીકે લડશે કે અન્ય કોઈ રાજકીય પક્ષમાં જોડાશે.
