લોકસભા સાંસદ અને પૂર્વ મુખ્યમંત્રી મમતા બેનરજીના ભત્રીજા અભિષેક બેનરજીની મિલકતો સામે મોટી કાર્યવાહી થવાના સંકેત મળી રહ્યા છે. કોલકાતા નગર નિગમ (કેએમસી) દ્વારા તેમની એક ડઝનથી વધુ મિલકતોના સંદર્ભમાં નોટિસ ફટકારવામાં આવી હોવાના અહેવાલ છે. આ નોટિસ દ્વારા તેમને તમામ જરૂરી દસ્તાવેજો રજૂ કરવા માટે કહેવામાં આવ્યું છે. જોકે, આ બાબતે હજુ સુધી કોઈ સત્તાવાર નિવેદન જાહેર કરવામાં આવ્યું નથી. તાજેતરમાં જ મુખ્યમંત્રી શુભેન્દુ અધિકારીએ પણ સરકારી અધિકારીઓને તૃણમૂલ કોંગ્રેસ (ટીએમસી)ના નેતાઓની મિલકતોની વિગતો એકઠી કરવાના નિર્દેશ આપ્યા હોવાનું જણાવ્યું હતું.
મીડિયા રિપોર્ટ્સ મુજબ કેએમસીએ અભિષેક બેનરજીની ૧૭ જેટલી મિલકતોના ગેરકાયદે બાંધકામ અંગે નોટિસ મોકલી છે. આ નોટિસમાં ઇમારતોના સ્કેચ (નકશા), લિફ્ટ અને એસ્કેલેટર્સ સંબંધિત તમામ મહત્ત્વપૂર્ણ જાણકારીઓ માંગવામાં આવી છે. અધિકારીઓના જણાવ્યા અનુસાર, ટીએમસી નેતા પાસે આ નોટિસને પડકારવાના વિકલ્પો પણ ઉપલબ્ધ છે. પરંતુ, તેમણે એ સ્પષ્ટ કરવું પડશે કે આ ગેરકાયદે બાંધકામો શા માટે તોડી પાડવામાં ન આવે.
આ નોટિસમાં કોલકાતા નગર નિગમ (કેએમસી) અધિનિયમ, ૧૯૮૦ ની કલમ ૪૦૦(૧) હેઠળ કડક આદેશ આપવામાં આવ્યો છે. નોટિસમાં લખ્યું છે કે, ‘તમારી આ ઇમારતનો જેટલો ભાગ પરવાનગી વિના અથવા નિયમોની વિરુદ્ધ જઈને બનાવવામાં આવ્યો છે, તેને ૭ દિવસની અંદર તોડી પાડવામાં આવે.’ આ પ્રકારની નોટિસો અભિષેક બેનરજી સાથે જોડાયેલી તમામ ૧૭ પ્રોપર્ટીઝને મોકલવામાં આવી છે.
કેએમસીના સૂત્રોના જણાવ્યા અનુસાર, કલમ ૪૦૦(૧) હેઠળ મકાનમાલિકોને પોતાનો પક્ષ રજૂ કરવાની પૂરતી તક આપવામાં આવે છે. જો કોઈ બાંધકામ ગેરકાયદે સાબિત થાય તો પણ માલિક અધિકારીઓ સમક્ષ હાજર થઈને પોતાની દલીલો રજૂ કરી શકે છે. આ પ્રકારના મામલાની સુનાવણી કોલકાતા નગર નિગમના મુખ્ય મથકે થાય છે, જ્યાં સ્પેશિયલ ઓફિસર બંને પક્ષોની વાત સાંભળે છે.
કોલકાતા નગર નિગમ ની સુનાવણી પ્રક્રિયા પૂર્ણ થયા બાદ સ્પેશિયલ ઓફિસર પાસે આ મામલે નિર્ણય લેવા માટે મુખ્યત્વે બે કાનૂની રસ્તાઓ હોય છે. જેમાં પ્રથમ વિકલ્પ હેઠળ તેઓ પરવાનગી વગર નિયમોની વિરુદ્ધ જઈને ઊભું કરવામાં આવેલું ગેરકાયદે બાંધકામ તાત્કાલિક તોડી પાડવાનો આદેશ આપી શકે છે, અથવા તો બીજા વિકલ્પ તરીકે તેઓ તે ગેરકાયદે બાંધકામ પર ભારે મોટો દંડ ફટકારીને તેને નિયમો અનુસાર કાનૂની રીતે માન્ય પણ રાખી શકે છે.
ગેરકાયદે બાંધકામ ધરાવતી આ પ્રોપર્ટીઝમાં મોટે ભાગે રહેણાંક મકાનો અને ફ્લેટ્સ સામેલ છે. આ મિલકતો કાલીઘાટ, ગરિયાહાટ પાસે, પંડિતિયા અને કોલકાતાના અન્ય કેટલાક વિસ્તારોમાં આવેલી છે. આ બિલ્ડિંગોમાંથી કેટલીક ઇમારતોના માલિક ખુદ અભિષેક બેનરજી છે, જ્યારે કેટલીક મિલકતો તેમના નજીકના સંબંધીઓ અને કંપનીઓના નામે છે. આ સિવાય, કેટલાક મોટા એપાર્ટમેન્ટ્સના ફ્લેટ્સના કનેક્શન પણ અભિષેક અથવા તેમના નજીકના સાથીઓ સાથે જોડાયેલા હોવાનું સામે આવ્યું છે.
આ લડાઈ વચ્ચે મુખ્યમંત્રી શુભેન્દુ અધિકારીએ દાવો કર્યો છે કે અભિષેકની ૧૪ મિલકતો ‘લીપ્સ એન્ડ બાઉન્ડ્સ’ કંપની, 4 તેમના પોતાના અને ૬ પ્રોપર્ટી તેમના પિતાના નામે છે અને સરકાર ભ્રષ્ટાચારીઓને જેલમાં મોકલશે. બીજી તરફ, અભિષેકે પડકાર ફેંકતા કહ્યું છે કે ભલે મારું ઘર તોડી પાડવામાં આવે, પણ હું ભાજપ સામે નહીં ઝૂકું. તેમણે જે કરવું હોય એ કરવા દો. મારું ઘર તોડી નાખે કે નોટીસ મોકલે. હું તેમની સામે ઝૂકીશ નહીં, જે પણ થાય ભાજપ વિરુદ્ધ મારી લડાઈ ચાલુ રહેશે.
આ યાદીમાં કલકત્તાના એક સરનામે સંયુક્ત માલિક તરીકે ‘શ્રીમતી સાયોની ઘોષ’નું નામ સામે આવતા સોશિયલ મીડિયા પર જાધવપુરના સાંસદ સાયોની ઘોષ અંગે અટકળો શરૂ થઈ હતી. જોકે, સાંસદ સાયોની ઘોષે આ બાબતને સખત શબ્દોમાં નકારી કાઢી છે અને સ્પષ્ટ કર્યું છે કે આ મિલકત સાથે તેમને કોઈ લેવાદેવા નથી. તેમણે પોતાના મતદારોને ચૂંટણી એફિડેવિટ (હલફનામું) ચેક કરવા જણાવીને, ખોટી અફવા ફેલાવનારાઓ સામે કડક કાનૂની કાર્યવાહી કરવાની ખુલ્લી ધમકી આપી છે. ટીએમસીએ પણ ભાજપની આ આખી યાદીને ખોટી અને અવિશ્વસનીય ગણાવીને ફગાવી દીધી છે.
