રાષ્ટ્રીય સ્વયંસેવક સંઘ (આરએસએસ)ના સરસંઘચાલક મોહન ભાગવતે રવિવારે રામ મંદિરના દાન ચોરી મામલે મૌન તોડ્યું છે. નાગપુરમાં પત્રકારો સાથે વાતચીત કરતા તેમણે જણાવ્યું કે, સંઘના સરકાર્યવાહ દત્તાત્રેય હોસબાલેએ આ વિવાદ પર જે નિવેદન આપ્યું છે, તેઓ તેની સાથે સંપૂર્ણ સહમત છે. ભાગવતે ઉમેર્યું કે, હોસબાલેનું નિવેદન વાંચી લો, મારો અભિપ્રાય પણ એ જ છે.
આ પહેલા શુક્રવારે દત્તાત્રેય હોસબાલેએ કહ્યું હતું કે અયોધ્યા રામ મંદિરમાં દાનની રકમ ચોરી થવાની ઘટનાથી રામ ભક્તો અને સમગ્ર હિન્દુ સમાજની આસ્થાને ઊંડો આઘાત લાગ્યો છે. તેમણે માગ કરી હતી કે, આ મામલામાં જે પણ વ્યક્તિ દોષિત સાબિત થાય તેને કડકમાં કડક સજા મળવી જોઈએ.
હોસબાલેએ ચેતવણી આપી હતી કે, હિન્દુ વિરોધી તાકાતો આ કમનસીબ ઘટનાનો ફાયદો ઉઠાવીને હિન્દુ ધર્મને બદનામ કરવાનો પ્રયાસ કરી રહી છે. તેમણે હિન્દુ સમાજને અપીલ કરી છે કે આ મુશ્કેલ સમયમાં દરેક વ્યક્તિ ધૈર્ય રાખે અને શાંતિ જાળવી રાખે, જેથી આવી દેશવિરોધી ષડયંત્રોને નિષ્ફળ બનાવી શકાય.
દાન ચોરીની તપાસ માટે રચાયેલી એસઆઈટી ના પ્રાથમિક અહેવાલ પર ચર્ચા કરવા માટે સોમવારે અયોધ્યાની મણિ રામદાસ છાવણીમાં શ્રી રામ જન્મભૂમિ તીર્થ ક્ષેત્ર ટ્રસ્ટના સભ્યો એક મહત્વની બેઠક યોજશે. હાલ આ મામલામાં બે સમાંતર તપાસ ચાલી રહી છે, જેમાં એક તપાસ સ્પેશિયલ ઇન્વેસ્ટિગેશન ટીમ (એસઆઈટી) કરી રહી છે (જેનો સમયગાળો જુલાઈના અંત સુધી લંબાયો છે) અને બીજી તપાસ સ્થાનિક પોલીસ કરી રહી છે.
