૧૭ થી વધુના મોત, ૨૦૦ ઈજાગ્રસ્ત

ચીનમાં પૂરે ભારે તારાજી સર્જી છે. એવામાં સુપર ટાઇફૂન બાવી ત્રાટક્યું છે, ચીન પહેલાથી જ પૂરનો સામનો કરી રહ્યું છે અને આશરે છ જેટલી નદીઓ ભયજનક સપાટી પર વહી રહી છે. ભારે પૂરને કારણે આશરે એક લાખ લોકો ઘર વિહોણા થઇ ગયા છે. જ્યારે બાવી વાવાઝોડાની ભીતિને પગલે ૧૭ લાખ લોકોને સુરક્ષિત સ્થળે ખસેડવામાં આવ્યા છે. ફિલીપીન્સ, જાપાન અને તાઇવાનમાં પણ બાવી વાવાઝોડાએ જનજીવનને ભારે અસર કરી છે અને ૨૦ જેટલા લોકોનો ભોગ લીધો છે. હવે આ વાવાઝોડુ ચીન તરફ આગળ વધી રહ્યું છે.

ચીને શનિવારે સવાર સુધીમાં જ આશરે આશરે ૨૦ લાખ નાગરિકોને સુરક્ષીત સ્થળે ખસેડયા હતા, બાવી વાવાઝોડાને પહોંચી વળવાની તૈયારીના ભાગરૂપે તમામ સમુદ્રી વિસ્તારોમાંથી લોકોને સુરક્ષીત સ્થળે ખસેડાઇ રહ્યા છે. આશરે ૧૭૦૦૦ ઇમર્જન્સી રેસ્ક્યુ વર્કર્સને એલર્ટ રખાયા છે, સંભવીત પ્રભાવીત વિસ્તારોની તમામ શાળાઓ અને કોલેજોને બંધ રાખવામાં આવી છે. ફેરી સર્વિસ પણ સસ્પેન્ડ કરી દેવાઇ છે, હજારો ફ્લાઇટ્સ પણ રદ કરી દેવાઇ છે.

બાવી વાવાઝોડુ ચીન પર ત્રાટકે તે પહેલા ફિલિપાઇન્સમાં ભારે તારાજી સર્જી હતી, ગ્રામીણ વિસ્તારોમાં આશરે ૧૦ લોકો માર્યા ગયા હતા, કાલાનોગાસ ટાઉનમાં ભુસ્ખલનને કારણે પાંચ લોકો માર્યા ગયા હતા. જ્યારે છથી વધુ લોકો ગૂમ થયા છે. આશરે ૨૦ હજાર જેટલા લોકોને સુરક્ષીત સ્થળે ખસેડવામાં આવ્યા છે, ૧૦૦ જેટલા ઇમર્જન્સી શેલ્ટર હોમ તૈયાર કરાયા છે. જાપાન અને તાઇવાન પર પણ બાવી વાવાઝોડાએ ભારે અસર કરી છે.

તાઇવાનમાં આશરે ૧૧૩ લોકો ઘાયલ થયા છે, જ્યારે ૧૫૦૦૦ જેટલા લોકોને સુરક્ષીત સ્થળે ખસેડવામાં આવ્યા છે. શનિવારે દેશની તમામ શાળાઓ, કોલેજોને બંધ રાખવામાં આવી હતી. જાપનના ઓકીનાવા વિસ્તારમાં બાવી વાવાઝોડાએ ભારે અસર પહોંચાડી હતી, ભારે પવન સાથે ત્રાટકેલા વાવાઝોડાને પગલે ૨૦૦ જેટલી ફ્લાઇટ્સ રદ કરી દેવામાં આવી હતી. વાવાઝોડુ તાઇવાનથી આગળ નીકળી ગયું છે અને હવે ચીનની નજીક પહોંચી ગયું છે. ચીનના તાઇઝોઉ, જીન્જીદાઓ સહિતના આસપાસના ટાપુઓમાં ભારે એલર્ટ જાહેર કરવામાં આવ્યું છે.