રોહિત શર્માના કરિયરનો અંત?

ભારતીય ક્રિકેટ ટીમના દિગ્ગજ બેટ્સમેન રોહિત શર્માના વનડે કરિયરને લઈને એક ચોંકાવનારા સમાચાર સામે આવ્યા છે. ઇંગ્લેન્ડ સામે લોર્ડ્સમાં રમાનારી ત્રીજી વનડે મેચ બાદ રોહિત શર્માના વન ડે કરિયરનો અંત આવી શકે છે. બીસીસીઆઈ ના અંતરંગ સૂત્રોના જણાવ્યા અનુસાર, અજીત અગરકરની આગેવાની હેઠળની રાષ્ટ્રીય પસંદગી સમિતિ (સિલેક્શન કમિટી) હવે રોહિત શર્માને ૫૦ ઓવરના ફોર્મેટમાં ટીમમાં સામેલ કરવાના મૂડમાં નથી.

પસંદગીકારો સાઉથ આફ્રિકા, ઝિમ્બાબ્વે અને નામિબિયામાં યોજાનારા ૨૦૨૭ ના પુરુષ વનડે વર્લ્ડ કપ માટે અત્યારથી જ યુવા ઓપનર યશસ્વી જયસ્વાલને વધુમાં વધુ તક આપીને તૈયાર કરવા માંગે છે. બીસીસીઆઈ ના એક ઉચ્ચ સૂત્રએ ગુરુવારે જણાવ્યું કે, “સિલેક્ટર્સે નિર્ણય કરી લીધો છે કે તેઓ હવે રોહિત શર્માને વનડે ટીમમાં સ્થાન નહીં આપે. જો તેઓ સન્માનજનક રીતે નિવૃત્તિ લેવા માંગતા હોય કે તુરંત સંન્યાસ ન લેવો હોય, તો તે તેમનો અંગત નિર્ણય રહેશે. પરંતુ મેસેજ એકદમ ક્લિયર છે કે રવિવારે લોર્ડ્સમાં રમાનારી મેચ ભારતીય જર્સીમાં રોહિતની છેલ્લી વનડે મેચ હોઈ શકે છે.”

આ મોટા નિર્ણય પાછળ રોહિત શર્માનું તાજેતરનું ફોર્મ જવાબદાર હોવાનું મનાય છે. સોફિયા ગાર્ડન્સ ખાતે ઇંગ્લેન્ડ સામેની બીજી વનડેમાં તેણે ૨૬ રન માટે ઘણો સંઘર્ષ કરવો પડ્યો હતો. સૂત્રોના જણાવ્યા મુજબ, રોહિત છેલ્લા કેટલાક સમયથી પોતાની લયમાં દેખાતો નથી, જેના કારણે શાનદાર ફોર્મમાં ચાલી રહેલા યશસ્વી જયસ્વાલ જેવા યુવા ખેલાડીઓને બહાર બેસવું પડે છે. આ જ કારણે પસંદગીકારોએ લોન્ગ ટર્મ પ્લાનિંગ પર કામ કરવાનું શરૂ કર્યું છે.

રોહિત શર્મા ભારતને ૨૦૨૪ નો ટી-૨૦ વર્લ્ડ કપ જીતાડ્યા બાદ પહેલેથી જ ટી-૨૦ ઇન્ટરનેશનલ ક્રિકેટમાંથી નિવૃત્તિ લઈ ચૂક્યા છે. ત્યારબાદ ૭ મે, ૨૦૨૫ ના રોજ ઇંગ્લેન્ડ પ્રવાસ પહેલાં તેણે ટેસ્ટ ક્રિકેટ પણ છોડી દીધી હતી અને શુભમન ગિલને વનડે ટીમનો નવો કેપ્ટન બનાવવામાં આવ્યો હતો. રોહિત ૨૦૨૭ નો વર્લ્ડ કપ રમવા માંગતો હોવાથી વનડે ફોર્મેટ ચાલુ રાખ્યું હતું, પરંતુ હવે તેમના આ સપના પર પાણી ફરી વળે તેમ લાગી રહ્યું છે.