ગુજરાતમાં ૬ જિલ્લામાં રેડ એલર્ટ!

ગુજરાતના ૨૫૫ માંથી ૨૫૩ તાલુકામાં છેલ્લા ૨૪ કલાકમાં વરસાદ નોંધાયો હતો. જેમાં પાટણના સાંતલપુરમાં સૌથી વધુ ૧૨.૨૫ ઈંચ જ્યારે પાટણના રાધનપુરમાં ૯.૫૦ ઈંચ વરસાદ ખાબક્યો હતો. ભારે વરસાદને પગલે એક જ દિવસમાં ૩૦૭૩૬ સ્થળાંતર જ્યારે ૩ હજારનું રેસ્ક્યુ કરવામાં આવ્યું હતું. હવામાન વિભાગ દ્વારા હજુ આવતીકાલે ૭ જિલ્લામાં રેડ જ્યારે ૧૫ જિલ્લામાં ઓરેન્જ એલર્ટ આપવામાં આવ્યું છે.

કયા તાલુકામાં વધારે વરસાદ?

• સાંતલપુર (પાટણ) – ૧૨.૨૫ ઈંચ
• રાધનપુર (પાટણ) – ૯.૫૦ ઈંચ
• ભાભર (વાવ થરાદ) – ૭.૧૫ ઈંચ
• દાંતીવાડા (બનાસકાંઠા) – ૭.૦૦ ઈંચ
• દિયોદર (વાવ-થરાદ) – ૬.૭૫ ઈંચ
• મહેમદાવાદ (ખેડા) – ૬.૭૦ ઈંચ
• થાનગઢ (સુરેન્દ્રનગર) – ૬.૫૦ ઈંચ
• વાંકાનેર (મોરબી) – ૬.૫૦ ઈંચ
• નડિયાદ (ખેડા) – ૫.૫૦ ઈંચ
• ધનસુરા (અરવલ્લી) – ૪.૫૦ ઈંચ
• ખેરાલુ (મહેસાણા) – ૪.૫૦ ઈંચ
• હડાદ (બનાસકાંઠા) – ૪.૫૦ ઈંચ
• આગથળા (બનાસકાંઠા) – ૪.૫૦ ઈંચ
• દહેગામ (ગાંધીનગર) – ૪.૨૫ ઈંચ
• વિરપુર (મહીસાગર) – ૪.૦૦ ઈંચ

છેલ્લા ૨૪ કલાકમાં વલસાડમાંથી સૌથી વધુ ૧૪૦૮૩, નવસારીમાંથી ૧૨૩૬૭, સુરતમાંથી ૨૮૧૦, અમદાવાદમાંથી ૪૧૭ લોકો પાણીમાં ફસાયેલા હોવાથી અન્યત્ર સ્થળાંતર કરવું પડ્યું હતું. એક દિવસમાં વલસાડમાંથી ૨૬૬૫ વ્યક્તિનું રેસ્ક્યુ કરાયું હતું. ૧ જૂન ૨૦૨૬ થી ૨૩ જુલાઈ ૨૦૨૬ દરમિયાન રાજ્યના ૪૦૬૬૫ વ્યક્તિનું સ્થળાંતર કરાયું છે જ્યારે ૬૭૬૬ નું રેસ્ક્યુ કરાયું છે. ઉત્તર ગુજરાતમાં વરસાદનું વધારે પ્રભુત્વ રહ્યું હતું. પાટણના સાંતલપુરમાં ૧૨.૨૫ ઈંચ, પાટણના રાધનપુરમાં ૯.૫૦, વાવ-થરાદમાં ૭.૧૫ ઈંચ, બનાસકાંઠાના દાંતીવાડામાં ૭ ઈંચ વરસાદ ખાબક્યો હતો.

ભારે વરસાદને પગલે ગુજરાતનું જનજીવન ખોરંભે ચડ્યું છે. હાલ રાજ્યના ૧૨૦૪ રસ્તા વાહનવ્યવહાર માટે બંધ છે, જેમાં વલસાડ જિલ્લાના સૌથી વધુ ૪૬૧ રોડનો સમાવેશ થાય છે. હાલ જે રસ્તા વાહનવ્યવહાર માટે બંધ છે તેમાં ૩૦ સ્ટેટ હાઈવે, ૧૧૧૯ પંચાયત માર્ગ, ચાર નેશનલ હાઈવે, ૩ NHAI જ્યારે ૪૮ અન્ય માર્ગનો સમાવેશ થાય છે. જિલ્લા પ્રમાણે જોવામાં આવે તો નવસારીમાં ૨૪૮, સુરતમાં ૨૪૪, તાપીમાં ૧૯૦, ડાંગમાં ૧૯, સુરેન્દ્રનગરમાં ૧૧, અમદાવાદના ૮ હાઈવેનો સમાવેશ થાય છે.

વરસાદથી ૪૦૯૫ ગામડામાં અંધારપટ છવાયો હતો. આ પૈકી ૩૭૬૨ ગામડામાં વીજપુરવઠો પૂર્વવત થયો છે અને ૩૩૩ માં હજુ અંધારપટ છે. ૮૨૦૭ ફીડર્સ, ૭૮૮૨ પોલ્સ અને ૪૦૯ ટ્રાન્સફોર્મેશન સેન્ટરને ભારે વરસાદથી નુકસાન થયેલું છે.