ભારતમાં અનેક પ્રાચીન અને ઐતિહાસિક મંદિરો આવેલા છે, જે પોતાના રહસ્યોને કારણે જાણીતા છે. આવા જ રહસ્યમય મંદિરોમાં તેલંગાણાના વરંગલ જિલ્લામાં આવેલું હેમાચલા લક્ષ્મી નરસિંહ સ્વામી મંદિર પણ સામેલ છે. માન્યતા મુજબ આ મંદિર ૪ હજાર વર્ષથી પણ વધુ પ્રાચીન છે અને તેની સાથે જોડાયેલા અનેક રહસ્યો આજે પણ લોકોમાં કૌતૂક જગાવે છે.
સમુદ્ર સપાટીથી આશરે ૧,૫૦૦ ફૂટની ઊંચાઈ પર આવેલા મલ્લૂર ગામ નજીક પર્વતની ટોચ પર આ મંદિર સ્થિત છે. ભગવાન નરસિંહ સ્વામીના દર્શન કરવા માટે શ્રદ્ધાળુઓએ અંદાજે ૧૫૦ પગથિયાં ચઢવા પડે છે. આધ્યાત્મિક સાધના અને ધ્યાનમાં રસ ધરાવતા લોકો માટે આ મંદિર વિશેષ આકર્ષણનું કેન્દ્ર માનવામાં આવે છે.
આ મંદિરનું સૌથી મોટું આકર્ષણ ભગવાન નરસિંહ સ્વામીની રહસ્યમય પ્રતિમા છે. મંદિર સાથે જોડાયેલી લોકમાન્યતા મુજબ આ પ્રતિમાની સપાટી અત્યંત કોમળ છે. એવું માનવામાં આવે છે કે પ્રતિમાને હળવેથી દબાવવામાં આવે તો ત્યાં લાલ નિશાન દેખાય છે અને વધુ દબાણ કરવામાં આવે તો પ્રતિમામાંથી લોહી નીકળે છે.
સ્થાનિક માન્યતા અનુસાર પ્રતિમામાંથી સમયાંતરે લોહી નીકળતું હોવાથી મંદિરના પૂજારીઓ ભગવાનની પ્રતિમા પર સતત ચંદનનો લેપ કરતા રહે છે, જેથી લોહી નીકળવાનું બંધ રહે.
પૌરાણિક કથાઓ મુજબ ભગવાન નરસિંહની આ પ્રતિમા સ્વયંભૂ છે, એટલે કે તે પાતાળમાંથી સ્વયં પ્રગટ થઈ હોવાનું માનવામાં આવે છે. આ કારણે દેશ-વિદેશમાંથી મોટી સંખ્યામાં શ્રદ્ધાળુઓ અહીં શાંતિ, આધ્યાત્મિક અનુભૂતિ અને ભગવાનના આશીર્વાદ મેળવવા માટે આવે છે.
મંદિર સાથે જોડાયેલી માન્યતા મુજબ અહીં ભગવાનના દર્શન કરવાથી જીવનના દુઃખો દૂર થાય છે. એટલું જ નહીં, નિઃસંતાન દંપતિઓને પણ ભગવાન નરસિંહના આશીર્વાદથી સંતાનસુખ પ્રાપ્ત થાય છે તેવી શ્રદ્ધા ભક્તોમાં જોવા મળે છે.
વિશ્વ સમાચાર રિપોર્ટર
( કલ્પેશ એન લીંબાસિયા )
નોંધ: પ્રતિમામાંથી લોહી નીકળવા અથવા પ્રતિમા જીવંત હોવાના દાવા ધાર્મિક માન્યતાઓ પર આધારિત છે. તેની વૈજ્ઞાનિક પુષ્ટિ ઉપલબ્ધ નથી.