હોબાળો બંધ કરો, વિદ્યાર્થીઓનું ભવિષ્ય પહેલી પ્રાથમિકતા,
કેન્દ્રીય સંસદીય બાબતોના મંત્રી કિરેન રિજીજુએ સોમવારે વિપક્ષને અપીલ કરી છે કે તેઓ ગૃહને સુચારૂ રૂપે ચાલવા દે અને પરીક્ષા સુધારણા બિલ પર વિસ્તૃત ચર્ચામાં ભાગ લે. તેમણે ભારપૂર્વક જણાવ્યું કે, પ્રસ્તાવિત કાયદો દેશના વિદ્યાર્થીઓના ભવિષ્યને સુરક્ષિત કરવા અને પરીક્ષા પ્રણાલીને વધુ મજબૂત તથા પારદર્શક બનાવવા માટે લાવવામાં આવ્યો છે.
લોકસભામાં સોમવારે વિપક્ષી બેન્ચોના જોરદાર સૂત્રોચ્ચાર અને હોબાળા વચ્ચે ‘પબ્લિક એક્ઝામિનેશન્સ (પ્રિવેન્શન ઓફ અનફેયર મીન્સ) અમેન્ડમેન્ટ બિલ, ૨૦૨૬’ રજૂ કરવામાં આવ્યું હતું. ગૃહની કાર્યવાહી સ્થગિત થયા બાદ પત્રકારો સાથે વાત કરતા રિજીજુએ કોંગ્રેસ અને અન્ય વિપક્ષી દળો પર આક્ષેપ કર્યો હતો કે તેઓ દેશભરના વિદ્યાર્થીઓ સાથે સીધા જોડાયેલા આ મહત્વપૂર્ણ કાયદા પર ચર્ચા ટાળી રહ્યા છે અને પ્લેકાર્ડ તથા સૂત્રોચ્ચાર દ્વારા સંસદની કાર્યવાહીમાં અવરોધ ઊભો કરી રહ્યા છે.
મંત્રીએ વિપક્ષને સહકાર આપવા અપીલ કરતા જણાવ્યું કે વડાપ્રધાન નરેન્દ્ર મોદીએ અગાઉથી જ પરીક્ષા પ્રણાલીમાં વ્યાપક સુધારાઓની ભલામણ કરવા અને પેપર લીક કે ગેરરીતિમાં સંડોવાયેલા લોકો સામે કડક કાર્યવાહી સુનિશ્ચિત કરવા માટે ઉચ્ચ સ્તરીય ટાસ્ક ફોર્સની રચના કરી છે. આ દિશામાં સરકારે આ ઐતિહાસિક બિલ રજૂ કર્યું છે. તેમણે ચેતવણી આપી હતી કે જો આ મહત્વપૂર્ણ બિલ પર સંસદમાં ચર્ચા નહીં થાય તો દેશના યુવાનોમાં ખોટો સંદેશ જશે. સંસદ એ રાષ્ટ્રીય મહત્વના મુદ્દાઓ પર ચર્ચા કરવાનું સર્વોચ્ચ મંચ હોવાનું જણાવી રિજીજુએ તમામ રાજકીય પક્ષોને રાજકીય મતભેદો બાજુ પર રાખીને વિદ્યાર્થીઓના હિતમાં આ બિલને સર્વાનુમતે પસાર કરવા અનુરોધ કર્યો હતો.
