ડાબર ની અનેક પ્રોડક્ટ્સની વેચાણ પ્રક્રિયા રોકાઈ
દેશની અગ્રણી એફએમસીજી કંપની ડાબર ઇન્ડિયા સામે ફૂડ સેફ્ટી એન્ડ સ્ટાન્ડર્ડ્સ ઓથોરિટી ઓફ ઇન્ડિયા (એફએસએસએઆઈ)એ મહત્વપૂર્ણ કાર્યવાહી કરી છે. નિયમનકારી સંસ્થાએ કંપનીને તેના કેટલાક ખાદ્ય ઉત્પાદનો પર કરવામાં આવેલા “૧૦૦ % શુદ્ધ” જેવા દાવા અંગે વાંધો ઉઠાવી તાત્કાલિક જરૂરી સુધારા કરવા અને આવા દાવા સાથેના ઉત્પાદનોનું વેચાણ રોકવા સૂચના આપી છે.
એફએસએસએઆઈ ના જણાવ્યા અનુસાર “૧૦૦ % શુદ્ધ”, “૧૦૦ % કુદરતી”, “૧૦૦ % શુદ્ધતાની ગેરંટી” અને “૧૦૦ % ઓર્ગેનિક” જેવા દાવા ગ્રાહકોને ગેરમાર્ગે દોરી શકે છે. નિયમનકારી સંસ્થાનું કહેવું છે કે આવા દાવાઓને વૈજ્ઞાનિક રીતે સંપૂર્ણ રીતે સાબિત કરવું શક્ય નથી અને તે ફૂડ સેફ્ટી એન્ડ સ્ટાન્ડર્ડ્સ (જાહેરાત અને દાવાઓ) નિયમો, ૨૦૧૮ નું ઉલ્લંઘન કરે છે.
એફએસએસએઆઈ એ ડાબરના મધ, દેશી ઘી, એપલ સાઇડર વિનેગર, વર્જિન કોકોનટ ઓઇલ, તલનું તેલ, કોકોનટ વોટર, કોકોનટ મિલ્ક સહિતના અનેક ઉત્પાદનો પર કરવામાં આવેલા દાવાઓ સામે વાંધો નોંધાવ્યો છે.
ઓર્ગેનિક લોગો અંગે પણ વાંધો
નિયમનકારી સંસ્થાએ જણાવ્યું કે કેટલાક ઉત્પાદનો પર જરૂરી માન્યતા વિના “ઓર્ગેનિક ઇન્ડિયા”નો લોગો દર્શાવવામાં આવ્યો હોવાનું પણ ધ્યાનમાં આવ્યું છે. આ પ્રકારની રજૂઆત ગ્રાહકોમાં ગેરસમજ ઊભી કરી શકે છે.
૧૫ દિવસમાં રિપોર્ટ સોંપવાનો આદેશ
એફએસએસએઆઈ એ ડાબર ઇન્ડિયાને “૧૦૦ %” જેવા ભ્રામક દાવા ધરાવતા તમામ ખાદ્ય ઉત્પાદનો અંગે જરૂરી કાર્યવાહી કરીને ૧૫ દિવસની અંદર કાર્યવાહી અહેવાલ (એટીઆર) રજૂ કરવા સૂચના આપી છે.
કંપની તરફથી આ મામલે હજુ સુધી કોઈ વિગતવાર સત્તાવાર પ્રતિક્રિયા જાહેર કરવામાં આવી નથી. તપાસ અને નિયમનકારી પ્રક્રિયા આગળ વધતા વધુ વિગતો સામે આવી શકે છે.
